اقش-تىڭ فلوريدا شتات گۋبەرناتورى رون دەسانتيس پالم-بيچتەگى حالىقارالىق اۋەجايدى دونالد ترامپ قۇرمەتىنە قايتا اتاۋ تۋرالى جارلىققا قول قويدى، دەپ حابارلايدى "ادىرنا" ۇلتتىق پورتالى.
ەندى اۋەجايعا «دونالد دج. ترامپ اتىنداعى حالىقارالىق اۋەجاي» اتاۋىن بەرۋ جوسپارلانىپ وتىر.
الايدا بۇل وزگەرىس كۇشىنە ەنۋى ءۇشىن اقش-تىڭ فەدەرالدىق ازاماتتىق اۆياتسيا باسقارماسىنىڭ ماقۇلداۋى قاجەت. ەگەر رۇقسات بەرىلسە، جاڭا اتاۋ 1 شىلدەدەن باستاپ رەسمي تۇردە قولدانىسقا ەنگىزىلەدى.
اتالعان اۋەجاي پالم-بيچ قالاسىندا ورنالاسقان جانە ترامپتىڭ مار-ا-لاگو گولف كلۋبىنان شامامەن 6,5 شاقىرىم جەردە.
فلوريداداعى رەسپۋبليكالىق پارتيا بۇل شەشىمدى ءىس جۇزىندە قابىلداندى دەپ ساناپ وتىر. ولار الەۋمەتتىك جەلىدە: «فلوريدا رەسمي تۇردە جاريالايدى! پالم-ءبيچتىڭ ءدال ورتاسىندا ورنالاسقان جاڭا پرەزيدەنت دونالد دج. ترامپ اتىنداعى حالىقارالىق اۋەجايعا قوش كەلدىڭىزدەر!» دەپ جازدى.
WFLX-TV تەلەارناسىنىڭ مالىمەتىنشە، اتاۋدى وزگەرتۋ سالىق تولەۋشىلەرگە شامامەن 5,5 ميلليون دوللار شىعىن اكەلۋى مۇمكىن. وسىعان بايلانىستى شتاتتاعى دەموكراتتار زاڭ جوباسىنا قارسى شىققان.
The Hill جازۋىنشا، ترامپ پرەزيدەنتتىك قىزمەتىنە قايتا ورالعاننان بەرى ونىڭ ەسىمى بىرقاتار نىساندار مەن باعدارلامالارعا بەرىلگەن. ولاردىڭ قاتارىندا كەننەدي ورتالىعى، اقش بەيبىتشىلىك ينستيتۋتى، TrumpRx ءدارى-دارمەك پلاتفورماسى جانە بالالارعا ارنالعان ينۆەستيتسيالىق «ترامپ شوتتارى» بار.
