اباي كىتاپحاناسىندا ۇلتتىق كىتاپ كۇنى جانە كىتاپحاناشىلار كۇنى اياسىندا «ۇزدىك وقىرمان – 2026» سالتاناتتى ماراپاتتاۋ ءراسىمى ءوتتى.
بيىلدان باستاپ قازاقستاندا كىتاپحاناشىلار كۇنىن اتاپ ءوتۋ تارتىبىنە وزگەرىس ەنگىزىلىپ، كاسىبي مەرەكە 23 ساۋىرگە بەلگىلەندى. بۇل كۇن مەملەكەت باسشىسى قاسىم-جومارت توقاەۆتىڭ باستاماسىمەن بەكىتىلگەن ۇلتتىق كىتاپ كۇنىمەن سايكەس كەلەدى. مەرەكەلەردىڭ ءبىر كۇنگە توعىسۋى ولاردىڭ قوعامدىق جانە مادەني ماڭىزىن ارتتىرا تۇسپەك.
اتالعان مەرەكەلەر اياسىندا ۇيىمداستىرىلىپ وتىرعان ءىس-شارانىڭ نەگىزگى ماقساتى – قوعامدا وقۋ مادەنيەتىن قالىپتاستىرۋ، كىتاپ وقۋعا دەگەن قىزىعۋشىلىقتى ارتتىرۋ جانە كىتاپحانا وقىرماندارىن ىنتالاندىرۋ.
سالتاناتتى ءراسىم بارىسىندا كىتاپحانا سالاسىنىڭ دامۋىنا ەلەۋلى ۇلەس قوسقان قىزمەتكەرلەر جانار ابيشەۆا مەن ارۋجان كابدولداەۆاعا اباي كىتاپحاناسى ديرەكتورىنىڭ العىس حاتتارى تابىستالدى. سونىمەن قاتار، كىتاپحانانىڭ ۇزدىك وقىرماندارى دا ماراپاتتالىپ، قۇرمەتكە يە بولدى.
مەرەكەلىك كەشتە قر مادەنيەت سالاسىنىڭ ۇزدىگى ساياحات تۇرلىبەكوۆ، قر قك ۇلتتىق اسكەري-پاتريوتتىق ورتالىعى سەمەي فيليالىنىڭ انشىلەرى سەرىكبول سەيىلحانوۆ، بايان يبراەۆا، دارىن اسقارۇلى جانە «امانات» بيشىلەر توبى ونەر كورسەتىپ، كەشتىڭ ءمانى مەن مازمۇنىن ارتتىردى. سونداي-اق، شارا قوناقتارىنىڭ اراسىندا ينتەللەكتۋالدى ويىن ويناتىلىپ، وقىرمانداردىڭ مەرەكەلىك كوڭىل كۇيلەرى ەسەلەنە ءتۇستى.
ءىس-شاراعا سەمەي قالاسىنىڭ كوللەدج كىتاپحاناشىلارى، وقىرماندار، ستۋدەنتتەر جانە قالا تۇرعىندارى قاتىسىپ، كىتاپ پەن رۋحانيات توعىسقان مەرەكەلىك كەشتەن كوڭىلدى تارقاستى.
ريما قاناپياقىزى،
اباي اتىنداعى وبلىستىق ءامباباپ كىتاپحاناسى،
دامىتۋ ءبولىمىنىڭ باسشىسى
