وزبەكستاندىق ءانشى يۋلدۋز ۋسمانوۆاعا يران ەلشىلىگى ارنايى سىيلىق تابىستادى، دەپ حابارلايدى “ادىرنا” ۇلتتىق پورتالى.
الەۋمەتتىك جەلىلەردە تاراعان ۆيدەودا يراننىڭ وزبەكستانداعى ەلشىلىگى وكىلدەرىنىڭ انشىگە ارنايى سىيلىقتى تابىستاپ جاتقان ءساتى كورسەتىلگەن. ۆيدەودا ايتىلعانداي، سىيلىقتى يران يسلام رەسپۋبليكاسىنىڭ وزبەكستانداعى ەلشىسى ءمۇحاممادالي يسكانداري مەن مادەني بايلانىستار جونىندەگى كەڭەسشى حاسان سافارحاني جولداعان.
وزبەكستاندىق باق ەلشىلىك وكىلدەرى سىيلىقتىڭ پالەستينا، يران اۋماعىنداعى بەيبىت تۇرعىندار مەن بالالاردى قولداعانى ءۇشىن بەرىلگەنىن اتاپ وتكەنىن حابارلادى.
ايتا كەتەيىك، بۇعان دەيىن اقش-تا 9 مامىرعا جوسپارلانعان كونتسەرتى نيۋ-يوركتەگى “Ocean” تەاترىندا ءوتۋى ءتيىس بولعان. الايدا جەرگىلىكتى ساياساتكەرلەر مەن ەۆرەي ۇيىمدارىنىڭ نارازىلىعىنان كەيىن كونتسەرت توقتاتىلدى.
نارازىلىق بىلدىرۋشىلەر ءانشىنى انتيسەميتتىك سيپاتتاعى مالىمدەمەلەر جاسادى دەپ ايىپتاعان. ال يۋلدۋز ۋسمانوۆا ءوز كەزەگىندە پالەستينانى قولدايتىنىن ايتىپ، كوزقاراسىنان باس تارتپايتىنىن مالىمدەدى.
