فوتو: Bes.media
استانادا ەكىنشى دۇنيەجۇزىلىك سوعىس جىلدارىندا فرانتسياداعى قارسىلاسۋ قوزعالىسىنا قاتىسقان بەس قازاقستاندىق جاۋىنگەرگە قايتىس بولعاننان كەيىن مەملەكەتتىك ماراپاتتار تابىستالدى. ءىس-شارا تۋرالى BES.media جازدى، دەپ حابارلايدى “ادىرنا”.
ماراپاتتاردى قازاقستانداعى فرانتسيا رەسپۋبليكاسىنىڭ ەلشىسى سيلۆان گيوگە مارقۇمداردىڭ تۋىستارىنا تابىس ەتتى. ءراسىم شارل دە گولل ەسكەرتكىشى جانىندا ءوتتى. وعان قورعانىس مينيسترلىگىنىڭ وكىلدەرى مەن قازا تاپقان جاۋىنگەرلەردىڭ وتباسىلارى قاتىستى.
قايتىس بولعاننان كەيىن ماراپاتتالعاندار قاتارىندا بەكتەمىر بايجانوۆ، نۇرانباي بايمۇراتوۆ، احمەت بەكتاەۆ، وتەلەۋ بيسەنعاليەۆ جانە احمەت سۇبالوۆ بار.
سالتاناتتى شارا بارىسىندا قاتىسۋشىلار شارل دە گولل ەسكەرتكىشىنە گۇل شوقتارىن قويىپ، ەرلىكپەن قازا تاپقان جاۋىنگەرلەردى ەسكە الدى.
اسكەري-تاريحي مۋزەيدىڭ جەتەكشىسى داۋلەت قادىروۆتىڭ ايتۋىنشا، وتكەن جىلى دا فرانتسيا تاراپى ءۇش قازاقستاندىق پارتيزانعا ماراپات تاپسىرعان بولاتىن.
قازاقستاندىق جاۋىنگەرلەردىڭ فرانتسياداعى قارسىلاسۋ قوزعالىسىنا قاتىسۋى تۋرالى دەرەكتەردى تاريحشى گۇلنار مەندىقۇلوۆا انىقتاعان. ول ەكىنشى دۇنيەجۇزىلىك سوعىسقا قاتىسقان قازاقستاندىقتاردىڭ تاعدىرىن زەرتتەپ كەلەدى.
سىرتقى ىستەر مينيسترلىگىنىڭ مالىمەتىنە سايكەس، زەرتتەۋ بارىسىندا فرانتسۋز قارسىلاسۋ قوزعالىسىندا سوعىسقان جەتى قازاقستاندىق تۋرالى قۇجاتتار تابىلعان. سونداي-اق فرانتسياداعى Chambière اسكەري زيراتىندا جەرلەنگەن 20-دان استام قازاقستاندىق جونىندە دە مالىمەتتەر انىقتالعان.
