اقش پرەزيدەنتى دونالد ترامپ يراننىڭ سوعىستى توقتاتۋعا قاتىستى امەريكالىق جوسپارعا بەرگەن جاۋابىن قابىلدامادى. ال ورمۇز بۇعازىنداعى بلوكادا ءالى دە جالعاسىپ جاتىر، دەپ حابارلايدى «ادىرنا» ءتىلشىسى BBC-گە سىلتەمە جاساپ.
يران جەكسەنبى كۇنى اقش-تىڭ كەلىسسوزدەردى قايتا جانداندىرۋ تۋرالى ۇسىنىسىنا جاۋاپ بەردى. وندا سوعىستى توقتاتۋ ماسەلەسىنە، سونىڭ ىشىندە ليۆانداعى جاعدايعا باسىمدىق بەرىلگەنى ايتىلعان. يران مەملەكەتتىك تەلەارناسىنىڭ حابارلاۋىنشا، تەگەران قايتادان اسكەري شىعىن ءۇشىن وتەماقى تالاپ ەتىپ، ورمۇز بۇعازى ۇستىندەگى يراننىڭ ەگەمەندىگىن مويىنداۋدى تالاپ ەتكەن.
سونداي-اق يران اقش-تان اسكەري-تەڭىز بلوكاداسىن توقتاتۋدى، بولاشاقتا شابۋىل جاسالمايتىنىنا كەپىلدىك بەرۋدى، سانكتسيالاردى الىپ تاستاۋدى جانە يران مۇنايىن ساتۋعا قويىلعان تىيىمدى جويۋدى سۇراعان. الايدا اق ءۇي باسشىسى يراننىڭ ۇسىنىسىن قابىلداماعان.
بۇعان دەيىن اقش پەن يران اراسىنداعى كەلىسسوزدەرگە دەلدال بولىپ وتىرعان پاكىستان پرەمەر-ءمينيسترى شەحباز شاريف تەگەران جوسپارىنىڭ الىنعانىن راستاعان ەدى.
اقش ءوز ۇسىنىستارىن رەسمي تۇردە جاريالاعان جوق. بىراق باق مالىمەتىنشە، ءسوز يراننىڭ يادرولىق باعدارلاماسى بويىنشا كەلىسسوزدەرگە جول اشۋى مۇمكىن 14 تارماقتان تۇراتىن مەموراندۋم تۋرالى بولىپ وتىر.
جەكسەنبى كۇنى ترامپ Truth Social جەلىسىندە يراننان كەلگەن جاۋاپپەن تانىسقانىن جازدى.
«ماعان ول ۇنامادى. مۇلدە قابىلداۋعا بولمايدى!» — دەپ مالىمدەدى اقش پرەزيدەنتى.
ول امەريكالىق جوسپاردىڭ ناقتى مازمۇنىن دا، يران جاۋابىنىڭ ەگجەي-تەگجەيىن دە اشىپ ايتقان جوق.
