انتاركتيكا باعىتىندا جۇرگەن MV Hondius كرۋيزدىك كەمەسىندە تىركەلگەن حانتاۆيرۋس ىندەتى كەزىندە بورتتا قازاقستان ازاماتتارى بولماعان، دەپ حابارلايدى "ادىرنا" ۇلتتىق پورتالى.
بۇل تۋرالى ەلدىڭ سىرتقى ىستەر مينيسترلىگى مالىمدەدى.
ءسىم رەسمي وكىلى ەرلان جەتىباەۆتىڭ ايتۋىنشا، يسپانيا دەنساۋلىق ساقتاۋ مينيسترلىگىنىڭ دەرەكتەرىنە سايكەس، اتالعان كەمەدەگى جولاۋشىلار اراسىندا قازاقستان ازاماتتارى تىركەلمەگەن.
بۇعان دەيىن MV Hondius كرۋيزدىك لاينەرىندە حانتاۆيرۋس ينفەكتسياسىنىڭ تارالۋى تىركەلگەنى حابارلانعان بولاتىن. كەمە 1 ساۋىردە ارگەنتينانىڭ ۋشۋايا قالاسىنان انتاركتيكا مەن وڭتۇستىك اتلانتيكاداعى شالعاي ارالدارعا ەكولوگيالىق كرۋيزگە شىققان. كەمە بورتىندا 23 ەلدەن كەلگەن 149 ادام بولعان.
الدىن الا مالىمەت بويىنشا، ىندەت سالدارىنان 11 ادام ۆيرۋس جۇقتىرعان. قازىرگى ۋاقىتقا دەيىن ءۇش ادام كوز جۇمدى. ولاردىڭ قاتارىندا نيدەرلاند ازاماتى مەن ونىڭ جۇبايى، سونداي-اق گەرمانيا ازاماتى بار. جاعدايعا قاتىستى بۇۇ ارنايى پىكىر بىلدىرگەن.
