2026 جىلدىڭ ءبىرىنشى توقسانىندا 1 260 قىتاي ازاماتى قازاقستانعا كوشىپ كەلگەن. بۇل كورسەتكىش وتكەن جىلدىڭ سايكەس كەزەڭىمەن سالىستىرعاندا شامامەن ءۇش ەسە وسكەن، دەپ حابارلايدى «ادىرنا» ءتىلشىسى Data Hub-قا سىلتەمە جاساپ.
ساراپشىلاردىڭ مالىمەتىنشە، قىتايدان كەلەتىن كوشى-قون دەڭگەيى قاڭتار–ناۋرىز ارالىعىندا سوڭعى 9 جىلدا العاش رەت وسىنداي جوعارى دەڭگەيگە جەتكەن. الايدا ءار جىلدارداعى العاشقى توقسانداردا كوشى-قون ديناميكاسى ايتارلىقتاي قۇبىلىپ وتىرعان. كەي جىلدارى كۇرت وسسە، كەي جىلدارى تومەندەگەن. مىسالى، 2024 جىلى قىتايدان كەلگەندەر سانى قاڭتار–ناۋرىزدا 98 ادامنان 750 ادامعا دەيىن، ياعني شامامەن سەگىز ەسە ارتقان.
«سوڭعى ەكى جىلداعى جوعارى كورسەتكىشتەر كوشى-قون بەلسەندىلىگىنىڭ جاندانا باستاعانىن كورسەتۋى مۇمكىن. ال 2026 جىلدىڭ باسىنداعى كۇشتى ناتيجە بۇل ءۇردىستىڭ جالعاسىپ جاتقانىن بىلدىرەدى»، — دەلىنگەن حابارلامادا.
قازىرگى ۋاقىتتا قىتاي قازاقستانعا تۇراقتى تۇرۋعا كوشكەن ازاماتتار سانى بويىنشا ءۇشىنشى ورىندا تۇر. ەكىنشى ورىنعا رەسەي تابان تىرەدى. بيىل 1 265 ادام كوشىپ كەلگەن، بۇل وتكەن جىلمەن سالىستىرعاندا 29%-عا كوپ.
ءبىرىنشى ورىندى وزبەكستان ساقتاپ وتىر. بيىل قازاقستانعا 2 275 ادام قونىس اۋدارعان، الايدا بۇل كورسەتكىش وتكەن جىلمەن سالىستىرعاندا 13% تومەن.
ساراپشىلاردىڭ ايتۋىنشا، قىتايدان قازاقستانعا كوشىپ كەلگەندەردىڭ 99,5%-ى – ەتنيكالىق قازاقتار. ولار كوبىنە استانا، الماتى، جەتىسۋ جانە الماتى وبلىستارىن قونىستانۋ ايماعى رەتىندە تاڭدايدى. سونداي-اق ماماندار كوشى-قون ستاتيستيكاسىنا تۇراقتى تۇرعىلىقتى جەرىن وزگەرتىپ تىركەلگەن شەتەلدىكتەر مەن ازاماتتىعى جوق ادامدار ەنگىزىلەتىنىن ناقتىلاعان.
