ءماجىلىس دەپۋتاتى ەكاتەرينا سمولياكوۆا ەلىمىزدە ىمداۋ ءتىلىن تولىققاندى قارىم-قاتىناس ءتىلى رەتىندە زاڭنامالىق دەڭگەيدە تانۋدى ۇسىندى. ءتيىستى دەپۋتاتتىق ساۋالدى ول پرەمەر-ءمينيستردىڭ اتىنا جولدادى، دەپ حابارلايدى «ادىرنا» ءتىلشىسى.
«قازاقتا: «ايتىلماعان ءسوز جەتىم»،- دەيدى. بىراق كەيدە ماسەلە ادامنىڭ ايتقىسى كەلمەگەنىندە ەمەس. ماسەلە — قوعامنىڭ ونى تۇسىنبەۋىندە. بۇگىندە ەلىمىزدە ەستۋ جانە سويلەۋ قابىلەتى بۇزىلعان 30 مىڭنان استام ادام بار. ونىڭ 5 مىڭعا جۋىعى — بالالار. ولار ءۇشىن ىمداۋ ءتىلى — جاي قارىم-قاتىناس قۇرالى ەمەس. بۇل — ولاردىڭ الەممەن بايلانىسى. بۇل — ولاردىڭ ءتىلى. بىراق پارادوكس مىنادا: قازاقستاندا ىمداۋ ءتىلى ءالى كۇنگە دەيىن زاڭنامالىق دەڭگەيدە مويىندالماعان. سالدارىنان مىڭداعان ازامات اقپاراتقا، بىلىمگە، جۇمىس ىستەۋگە، مەملەكەتتىك قىزمەتتەرگە تولىق قول جەتكىزە الماي وتىر. بۇل — تەڭ مۇمكىندىك ماسەلەسى»،-دەدى ول.
سمولياكوۆا قازىرگى تاڭدا جوعارى وقۋ ورىندارىندا ەستۋ قابىلەتى بۇزىلعان ستۋدەنتتەردىڭ سانى از ەكەنىن اتاپ ءوتتى.
«بۇگىندە جوو-لاردا وسى ساناتتاعى ستۋدەنتتەردىڭ سانى نەبارى 185 ادام. نەگە؟ سەبەبى ورتا بەيىمدەلمەگەن. قولجەتىمدىلىك ءالسىز. قولداۋ جەتكىلىكسىز. الەمدىك تاجىريبە مۇلدە باسقا. جاڭا زەلانديا ىمداۋ تىلىنە مەملەكەتتىك مارتەبە بەردى. فينليانديا ونى كونستيتۋتسيادا بەكىتتى. كوپتەگەن ەلدەردە ىمداۋ ءتىلى ءبىلىم بەرۋ مەن مەملەكەتتىك قىزمەتتىڭ اجىراماس بولىگىنە اينالعان. ال بىزدە ەستۋ جانە سويلەۋ قابىلەتى بۇزىلعان بالالارعا ساباق بەرەتىن سۋردوپەداگوگتاردىڭ سانى نەبارى 221 مامان عانا. بۇل مامانداردى ەلىمىزدە تەك 4 جوعارى وقۋ ورنى دايىندايدى. ال وسى ماماندىقتا وقىپ جاتقان ستۋدەنتتەر سانى — بار بولعانى 35 ادام. بۇل — كادر تاپشىلىعىنىڭ ناقتى كورىنىسى»،–دەدى دەپۋتات.
سونداي-اق ول سۋردواۋدارما قىزمەتىنىڭ ءليميتى جىلىنا 60 ساعاتپەن شەكتەلەتىنىن سىنعا الدى. دەپۋتاتتىڭ پىكىرىنشە، بۇل ۋاقىت ازاماتتاردىڭ كۇندەلىكتى قاجەتتىلىگىنە دە جەتپەيدى.
ءماجىلىس دەپۋتاتى ۇكىمەتتەن ىمداۋ ءتىلىن زاڭنامالىق دەڭگەيدە تانۋدى، ونى ءبىلىم بەرۋ، مەديتسينا، سوت، مەملەكەتتىك قىزمەت جانە باق سالالارىندا قولدانۋعا كەپىلدىك بەرۋدى سۇرادى. بۇدان بولەك، سۋردواۋدارما قىزمەتىنىڭ ءليميتىن قايتا قاراۋ، سۋبتيتر مەن سۋردواۋدارماسى بار كونتەنت كولەمىن ارتتىرۋ جانە سۋردوپەداگوگ ماماندارىن دايارلاۋ سانىن كوبەيتۋ ۇسىنىلدى.
«ەستۋ قابىلەتى بۇزىلعان ازاماتتارعا تەڭ مۇمكىندىك بەرۋ — بۇل قايىرىمدىلىق ەمەس. بۇل — ادىلەتتى مەملەكەتتىڭ بەلگىسى. بارلىعى داۋىسپەن سويلەمەۋى مۇمكىن. بىراق ءار ادامنىڭ ەستىلۋگە قۇقىعى بار»،- دەپ تۇيىندەدى ول.
