فوتو:Gov.kz
2026 جىلعى 13–14 مامىر كۇندەرى رەسەيدىڭ قازان قالاسىندا ICESCO باس كونفەرەنتسياسىنىڭ 15-سەسسياسى ءوتتى. حالىقارالىق جيىنعا ۇيىمعا مۇشە 53 مەملەكەتتىڭ وكىلدەرى قاتىسقان.
قازاقستان مادەنيەت جانە اقپارات مينيسترلىگىنىڭ مالىمەتىنشە، كونفەرەنتسيا بارىسىندا ICESCO-نىڭ 2020–2025 جىلدار ارالىعىنداعى قىزمەتىنىڭ قورىتىندىلارى قارالىپ، 2026–2029 جىلدارعا ارنالعان ستراتەگيالىق دامۋ جوسپارى تالقىلاندى. قۇجاتتا ۇيىمنىڭ ءبىلىم، عىلىم جانە مادەنيەت سالالارىنداعى الداعى باسىم باعىتتارى ايقىندالعان.
فورۋم اياسىندا قازاقستان ءۇشىن ماڭىزدى باستامالاردىڭ ءبىرى جاريالاندى. اتاپ ايتقاندا، تۇركىستان قالاسى 2027 جىلى يسلام الەمىنىڭ مادەني استاناسى مارتەبەسىن الۋعا ۇمىتكەر رەتىندە ۇسىنىلدى.
كونفەرەنتسيادا ءسوز سويلەگەن قازاقستان رەسپۋبليكاسىنىڭ مادەنيەت جانە اقپارات ۆيتسە-ءمينيسترى رۋستام ءالي سوڭعى جىلدارى قازاقستاننىڭ مادەني مۇرالارى يسلام الەمى دەڭگەيىندە كەڭىنەن تانىلىپ كەلە جاتقانىن اتاپ ءوتتى. ونىڭ ايتۋىنشا، ICESCO-نىڭ يسلام الەمى مۇرالارى تىزىمىنە ەلىمىزدەن «توعىزقۇمالاق» ءداستۇرلى ويىنى، «ويۋ-ورنەك» ونەرى جانە «قارماقشى جىراۋلارى» اۋىزشا پوەزيا ءداستۇرى ەنگىزىلگەن.
سونىمەن قاتار قازاقستان تاراپى 2026 جىلى الماتى قالاسىندا ءال-ءفارابيدىڭ ادامزات وركەنيەتىنە قوسقان ۇلەسىنە ارنالعان II حالىقارالىق كونفەرەنتسيا وتەتىنىن مالىمدەدى. ءىس-شارا ICESCO ۇيىمىمەن بىرلەسىپ ۇيىمداستىرىلادى.
ايتا كەتەيىك، ICESCO باس كونفەرەنتسياسى ءتورت جىلدا ءبىر رەت وتكىزىلەدى. بيىلعى جيىن گيبريدتى فورماتتا ۇيىمداستىرىلىپ، حالىقارالىق مادەني جانە عىلىمي ىنتىماقتاستىقتى نىعايتۋ ماسەلەلەرىنە باسىمدىق بەرىلدى.
