تانىمال پروديۋسەر ءارى ءانشى بولمانوۆ ءوتۋى ءتيىس كونتسەرتتىڭ كەيىنگە شەگەرىلۋ سەبەبىن ايتتى، دەپ حابارلايدى “ادىرنا” ۇلتتىق پورتالى.
ونەر يەسى الەۋمەتتىك جەلىدەگى رەسمي پاراقشاسىندا ارنايى مالىمدەمە جاريالاپ، شەشىم دەنساۋلىق جاعدايىنا بايلانىستى قابىلدانعانىن ايتتى.
ءانشىنىڭ ايتۋىنشا، رەسپۋبليكا سارايىندا ءوتۋى ءتيىس كونتسەرتكە شامامەن 3,5 مىڭ كورەرمەن بيلەت ساتىپ العان. سوعان قاراماستان دارىگەرلەر وعان ساحناعا شىعۋعا رۇقسات بەرمەگەن.
قىدىرالى بولمانوۆ ۇيىمداستىرۋشىلار كونتسەرتتى توقتاتپاي، ونى كرەسلوعا وتىرعىزىپ قويىپ وتكىزۋ تۋرالى ۇسىنىس جاساعانىن جەتكىزدى. الايدا ونەر يەسى مۇنداي فورماتتا كورەرمەن الدىنا شىعۋ وزىنە اۋىر بولعانىن ايتتى.
ء«ومىر بويى شاپقىلاپ، ەكى اياعىمەن جۇرگەن ادامعا كرەسلودا وتىرىپ، قوزعالماي ساحنادا ەل الدىندا ءان ايتۋ وتە ىڭعايسىز، تىم كۇردەلى ءارى قيىن ەكەن. ەڭ باستى سەبەپ – دارىگەرلەرىمنىڭ رۇقسات ەتپەۋى»، – دەپ جازدى ول.
سونداي-اق ءانشى رەسپۋبليكا سارايىنىڭ كونتسەرتتىك كەستەسى تىعىز بولعاندىقتان، كەشتى جاقىن كۇندەرگە اۋىستىرۋ مۇمكىن بولماعانىن اتاپ ءوتتى. وسىعان بايلانىستى مەرەيتويلىق كونتسەرت 18 ماۋسىمعا شەگەرىلدى.
ونەر يەسى جانكۇيەرلەرىنە قولداۋ بىلدىرگەنى ءۇشىن العىس ايتىپ، ساحناعا بۇرىنعىدان دا تىڭ كۇشپەن ورالاتىنىن جەتكىزدى.
