21 مامىردا وتكەن پارلامەنت ءماجىلىسىنىڭ جالپى وتىرىسىندا ءماجىلىس دەپۋتاتى قازىبەك يسا دەپۋتاتتاردىڭ مەملەكەتتىك سۇراقتارىنا ورىس تىلىندە جاۋاپ بەرگەن ادىلەت ۆيتسە-ءمينيسترى بوتاگوز جاقسەلەكوۆاعا ەسكەرتۋ جاسادى، دەپ حابارلايدى «ادىرنا» ءتىلشىسى.
ول مەملەكەتتىك تىلدە قويىلعان سۇراقتارعا جاۋاپ بەرۋ كەزىندە ۆيتسە-ءمينيستردىڭ ورىس ءتىلىن قولدانعانىن اتاپ ءوتتى.
«قارىنداسىما اعالىق ەسكەرتۋ ايتپاقشىمىن. ءسىز ادىلەت ۆيتسە-ءمينيسترى رەتىندە قازاقستاندا مەملەكەتتىك ءتىل قازاق ءتىلى ەكەنىن بىلمەيسىز بە؟ مەملەكەتتىك تىلدە سۇراق قويعان دەپۋتاتتاردىڭ بارلىعىنا مەملەكەتتىك تىلدە ەمەس، ورىس تىلىندە جاۋاپ بەردىڭىز! ءتىپتى ءماجىلىس دەپۋتاتى ەكاتەرينا سمولياكوۆنىڭ مەملەكەتتىك تىلدەگى سۇراعىنا دا مەملەكەتتىك تىلدە جاۋاپ بەرە المادىڭىز.. كەلەسىدە پارلامەنتكە كەلگەندە مەملەكەتتىك ءتىلدى ۇيرەنىپ كەلىڭىز. ادىلەت مينيسترلىگىندە قازاقشا بىلەتىن ادام بار شىعار، مەملەكەتتىك ءتىلدى بىلەتىن وكىلدى جىبەرسىن! ادىلەت ۆيتسە-ءمينيسترىنىڭ مەملەكەتتىك ءتىلدى بىلمەۋى – ادىلەتسىزدىك!»–دەدى ول.
ايتا كەتەيىك، بوتاگوز جاقسەلەكوۆا ادىلەت ۆيتسە-ءمينيسترى قىزمەتىنە 2023 جىلى تاعايىندالعان ەدى.
