ورال قالاسىنداعى مادەنيەت جانە دەمالىس ساياباعىندا «تازا قازاقستان» يدەولوگەماسى اياسىندا «جايىقTazaRiver» ەكولوگيالىق اكتسياسى ءوتتى. ءىس-شارانىڭ باستى ماقساتى – جاستار اراسىندا ەكولوگيالىق مادەنيەتتى قالىپتاستىرۋ، تابيعاتتى قورعاۋ ىسىنە قوعام نازارىن اۋدارۋ جانە بەلسەندى ازاماتتىق ۇستانىمدى دارىپتەۋ.
ەكولوگيالىق اكتسياعا باتىس قازاقستان وبلىسى اكىمىنىڭ ورىنباسارى قايىرجان ەرمەكۇلى مەڭدىعاليەۆ قاتىسىپ، جاستارمەن كەزدەسۋ بارىسىندا قورشاعان ورتانى قورعاۋدىڭ ماڭىزدىلىعىنا توقتالدى. ول ءوز سوزىندە «تازا قازاقستان» باستاماسى اياسىندا جۇزەگە اسىرىلىپ جاتقان جۇمىستاردىڭ قوعام ءۇشىن ماڭىزى زور ەكەنىن اتاپ ءوتتى.
شاراعا ءوڭىردىڭ بەلسەندى جانە تانىمال جاستارى قاتىسىپ، اشىق فورماتتا پىكىر الماستى. كەزدەسۋ بارىسىندا ەكولوگيالىق باستامالاردى دامىتۋ، جاستاردىڭ قوعامداعى ءرولى، ۆولونتەرلىك قىزمەتتى كەڭەيتۋ جانە جاسىل ويلاۋ مادەنيەتىن قالىپتاستىرۋ ماسەلەلەرى تالقىلاندى. قاتىسۋشىلار تابيعاتتى قورعاۋ تەك مەملەكەتتىك دەڭگەيدەگى مىندەت ەمەس، ءار ازاماتتىڭ جەكە جاۋاپكەرشىلىگى ەكەنىن ەرەكشە اتاپ ءوتتى.
اكتسيا اياسىندا جاستار جايىق وزەنى بويىمەن كەمە ارقىلى ءجۇزىپ ءوتىپ، جاعالاۋدى قوقىستان تازارتۋ جۇمىستارىن جۇرگىزدى. سونىمەن قاتار اعاش وتىرعىزۋ اكتسياسى ۇيىمداستىرىلىپ، ءوڭىردىڭ ەكولوگيالىق احۋالىن جاقسارتۋعا باعىتتالعان ناقتى ءىس-شارالار جۇزەگە اسىرىلدى. جاعالاۋ اۋماعىندا ەركىن فورماتتاعى باسقوسۋ ءوتىپ، قاتىسۋشىلار قورشاعان ورتانى قورعاۋعا قاتىستى ءوز ۇسىنىستارى مەن وي-پىكىرلەرىن ورتاعا سالدى.
بقو اكىمىنىڭ ورىنباسارى قايىرجان ەرمەكۇلى مەڭدىعاليەۆ:
«بۇگىنگى كەزدەسۋدىڭ باستى ماقساتى – جاستارعا “تازا قازاقستان” يدەياسىن كەڭىنەن ءتۇسىندىرۋ جانە ولاردىڭ بەلسەندى ازاماتتىق ۇستانىمىن قالىپتاستىرۋ. ەكولوگيالىق مادەنيەت – ەل بولاشاعىنىڭ ساپاسىن ايقىندايتىن ماڭىزدى فاكتورلاردىڭ ءبىرى. وسى باعىتتاعى جاستار باستامالارىن قولداۋ – ءبىزدىڭ باستى مىندەتىمىز. جىل باسىنان بەرى “تازا قازاقستان” اكتسياسى اياسىندا “وزىڭنەن باستا” چەللەندجى قولعا الىندى. چەللەندجدىڭ نەگىزگى ماقساتى – تابيعاتتى قورعاۋ مەن قورشاعان ورتاعا جاناشىرلىق ارقايسىمىزدىڭ وزىمىزدەن باستالاتىنىن ءتۇسىندىرۋ»، – دەدى.
كەزدەسۋ بارىسىندا جاستار سپيكەرلەرگە سۇراقتار قويىپ، ەكولوگيالىق ۆولونتەرلىك قوزعالىستى دامىتۋ، جاستار جوبالارىن قولداۋ جانە قوعامداعى ەكولوگيالىق جاۋاپكەرشىلىكتى ارتتىرۋ ماسەلەلەرى بويىنشا ءوز ۇسىنىستارىن ءبىلدىردى.
«جايىقTazaRiver» اكتسياسى جاستاردىڭ تابيعاتقا دەگەن جاناشىرلىعىن ارتتىرىپ، وڭىردەگى ەكولوگيالىق مادەنيەتتى دامىتۋعا باعىتتالعان ماڭىزدى باستامالاردىڭ بىرىنە اينالدى.
