الماتى قالاسىندا وتكەن رەسەيلىك ءانشى موت كونتسەرتى كەزىندە وتاندىق شىعارماشىلىق ۇجىمدار مەن شەتەلدىك ۇيىمداستىرۋشىلار اراسىندا تۇسىنىسپەۋشىلىك تۋىندادى. بەلگىلى ءبيشى ءارى حورەوگراف انەل قاليەۆا ءوز كومانداسىمەن بىرگە 21 مامىر كۇنى وتكەن كونتسەرتتە ونەر كورسەتۋدەن باس تارتقانىن مالىمدەدى، دەپ حابارلايدى "ادىرنا".
حورەوگرافتىڭ ايتۋىنشا، مۇنداي شەشىمگە دايىندىق بارىسىندا جەرگىلىكتى ماماندارعا كورسەتىلگەن كاسىبي قۇرمەتسىزدىك سەبەپ بولعان.
بۇل تۋرالى انەل قاليەۆا الەۋمەتتىك جەلىدەگى پاراقشاسىندا جازدى.
«مەن جانجال ىزدەيتىن ادام ەمەسپىن. بىراق كەشە رەپەتيتسيا كەزىندە شەتەلدىك توپتىڭ ءبىزدىڭ ونەرپازدارعا دەگەن سىيلاستىق تانىتپاعانىن بايقادىق. وسىدان كەيىن كوماندامەن بىرگە بۇل كونتسەرتتە بيلەمەيمىز دەپ شەشىپ، كەتىپ قالدىق. ءوز تاجىريبەمدە العاش رەت وسىنداي جاعدايعا تاپ بولدىم»، – دەدى ول.
سونداي-اق ول قازاقستانعا گاسترولدىك ساپارمەن كەلەتىن شەتەلدىك ارتىستەر مەن ولاردىڭ كومانداسى جەرگىلىكتى مامانداردىڭ ەڭبەگىن باعالاپ، كاسىبي ەتيكانى ساقتاۋ كەرەگىن اتاپ ءوتتى.
جەلىدە ءبيشىنىڭ ارەكەتىن قولداعاندار دا، سىناعاندار دا بولدى. كەيبىر قولدانۋشىلار مۇنداي ءىرى حالىقارالىق ساحنادان باس تارتۋدى ۇلكەن مۇمكىندىكتى جىبەرىپ الۋ دەپ باعالاسا، انەل قاليەۆا بۇل پىكىرمەن كەلىسپەيتىنىن جەتكىزدى.
«24 مامىر كۇنى ءوزىمىزدىڭ قايرات نۇرتاسپەن بىرگە ساحناعا شىعامىن. مەن ءۇشىن ناعىز مۇمكىندىك ءارى اڭىز – سول كىسى. ال ءبىزدى سىيلاماعان وزگە ەلدىڭ ءانشىسى ءۇشىن نامىسىمىزدى تاپتاتۋدىڭ قاجەتى جوق»، – دەدى حورەوگراف.
ونەر يەسىنىڭ بۇل مالىمدەمەسى الەۋمەتتىك جەلىدە قىزۋ تالقىلانىپ، كوپشىلىك قازاقستاندىق بيشىلەردىڭ كاسىبي ابىرويى مەن نامىسىن قورعاعان قادامىن قولداپ جاتىر.
