فرانتسيا پرەزيدەنتى ەممانۋەل ماكروننىڭ رەسمي رەزيدەنتسياسىندا ءتىنتۋ جۇرگىزىلدى. بۇل تۋرالى Le Monde فرانتسۋز گازەتى جازدى، دەپ حابارلايدى “ادىرنا”.
باسىلىم مالىمەتىنشە، 21 مامىر كۇنى ءپاريجدىڭ ەكى قارجىلىق سۋدياسى ەليسەي سارايىندا تەرگەۋ ارەكەتتەرىن وتكىزگەن. ءىس پانتەوندا وتكەن مەملەكەتتىك ەسكە الۋ راسىمدەرىن ۇيىمداستىرۋعا بولىنگەن كەلىسىمشارتتارعا قاتىستى.
تەرگەۋ اياسىندا سوڭعى جىلدارى فرانتسيانىڭ ۇلتتىق پانتەونىندا وتكەن بىرقاتار سالتاناتتى شارالاردى ۇيىمداستىرعان Shortcut Events كومپانياسىنىڭ قىزمەتى تەكسەرىلۋدە. بۇل راسىمدەرگە پرەزيدەنت ەممانۋەل ماكروننىڭ ءوزى دە قاتىسقان.
Le Monde دەرەگىنە سايكەس، بۇعان دەيىن 14 ساۋىردە جۇرگىزىلگەن العاشقى ءتىنتۋ ارەكەتى ناتيجە بەرمەگەن. سول كەزدە ۇلتتىق قارجىلىق پروكۋراتۋرا مەن سىبايلاس جەمقورلىققا قارسى ءبولىم وكىلدەرى ۇلتتىق ەسكەرتكىشتەر ورتالىعىندا، Shortcut Events كومپانياسىنىڭ كەڭسەلەرىندە جانە ءىس فيگۋرانتتارىنىڭ ۇيلەرىندە تەكسەرۋ جۇرگىزگەن. الايدا ەليسەي سارايىنا كىرۋگە رۇقسات ەتىلمەگەن.
پرەزيدەنت اكىمشىلىگى بۇل شەشىمدى فرانتسيا كونستيتۋتسياسىنداعى پرەزيدەنت رەزيدەنتسياسىنىڭ قول سۇعىلماۋشىلىعى تۋرالى باپپەن تۇسىندىرگەن.
قازىرگى ۋاقىتتا فرانتسيا بيلىگى ءىس بويىنشا رەسمي مالىمدەمە جاساعان جوق. تەرگەۋ جالعاسىپ جاتىر.
