ءيزرايلدىڭ اسىرە وڭشىل ءمينيسترى يتامار بەن-گۆيرگە فرانتسيا اۋماعىنا كىرۋگە تىيىم سالىندى. بۇل شەكتەۋ سەنبىدەن باستاپ كۇشىنە ەنەدى. بۇل تۋرالى X الەۋمەتتىك جەلىسىندە فرانتسيا سىرتقى ىستەر ءمينيسترى جان-نوەل باررو مالىمدەدى، دەپ حابارلايدى «ادىرنا» ءتىلشىسى.
«مۇنداي شەشىم ونىڭ Global Sumud فلوتيلياسىنا قاتىسقان فرانتسۋز جانە ەۋروپالىق ازاماتتارعا قاتىستى جول بەرۋگە بولمايتىن ارەكەتتەرىنە بايلانىستى قابىلداندى»، – دەپ جازدى مينيستر.
الەۋمەتتىك جەلىلەردە جاريالانعان ۆيدەودا يزرايل پرەمەر-ءمينيسترى بينيامين نەتانياحۋ ۇكىمەتىندەگى ۇلتتىق قاۋىپسىزدىك ءمينيسترى بەن-گۆير يزرايل اسكەري كۇشتەرى ۇستاعاننان كەيىن قولدارى بايلانىپ، تىزەرلەتىلگەن پالەستينانى قولداۋشى بەلسەندىلەردىڭ اراسىندا جۇرگەنى كورىنەدى. قورلاۋ سيپاتىنداعى قويىلىم رەتىندە باعالانعان بۇل كورىنىس حالىقارالىق دەڭگەيدە جانە يزرايل بۇقارالىق اقپارات قۇرالدارىندا قاتتى سىنعا ۇشىرادى. كوپشىلىك بۇل كادرلار ەلدىڭ بەدەلىنە نۇقسان كەلتىرەدى دەپ ەسەپتەدى.
يزرايل پرەمەر-ءمينيسترى دە ساياسي وداقتاسىن اشىق تۇردە سىنعا الىپ، بۇل ارەكەت ەۆرەي مەملەكەتىنىڭ «قۇندىلىقتارىنا ساي كەلمەيتىنىن» مالىمدەدى. الايدا ول بەن-گۆيردى ۇكىمەت قۇرامىنان شىعارعان جوق.
جان-نوەل باررونىڭ ايتۋىنشا، فرانتسۋز ديپلوماتياسى «ەشقانداي ناقتى پايدا اكەلمەيتىن» بۇل فلوتيليانىڭ ارەكەتىن قۇپتاماعان، سەبەبى ول تەك كونسۋلدىق قىزمەتتەردىڭ جۇمىسىن قيىنداتقان.
فرانتسيا سىرتقى ىستەر ءمينيسترىنىڭ سوزىنشە، يزرايلدىك ءمينيستردىڭ ارەكەتى «پالەستينالىقتارعا قارسى وشپەندىلىك پەن زورلىق-زومبىلىققا ۇندەيتىن شۋلى مالىمدەمەلەر مەن ارەكەتتەردىڭ جالعاسىنا اينالدى». سونداي-اق پاريج ءريمنىڭ ۇلگىسىمەن بريۋسسەلدەن يتامار بەن-گۆيرگە قارسى سانكتسيا ەنگىزۋدى سۇراپ وتىر.
مينيسترلىك مالىمەتىنشە، گازاعا باعىت العان فلوتيليا قۇرامىنداعى فرانتسيانىڭ 37 ازاماتىن يزرايل اسكەرى ۇستاپ، كەيىن ەلدەن شىعارىپ جىبەرگەن. ولار ىستانبۇل ارقىلى ءوز ەلدەرىنە قايتارىلعان.
قازىرگى مالىمەت بويىنشا، Global Sumud فلوتيلياسىنىڭ جەكەلەگەن قاتىسۋشىلارى مەن ۇيىم اتىنان سوتقا تالاپ-ارىزدار دايىندالىپ جاتىر.
