اقش پەن يران جاقىن ارادا قول قويۋى مۇمكىن مەموراندۋمدا اتىستى توقتاتۋ رەجيمىن 60 كۇنگە ۇزارتۋ قاراستىرىلعان. بۇل تۋرالى بۇگىن، 24 مامىردا Axios جازدى، دەپ حابارلايدى «ادىرنا» ءتىلشىسى.
قۇجاتقا سايكەس، يران وسى 60 كۇن ىشىندە ورمۇز بۇعازى ارقىلى كەمەلەردىڭ ءوتۋىن قايتا قامتاماسىز ەتەدى. ال اقش بۇل كەزەڭدە يراننان شىعاتىن مۇناي تيەلگەن تانكەرلەردى ۇستاپ قالمايدى.
جوسپار بويىنشا، تاراپتار قوسىمشا 60 كۇندى ەڭ كۇردەلى كەلىسپەۋشىلىكتەردى شەشۋگە جۇمساماق. اتاپ ايتقاندا، ولار يراننىڭ يادرولىق باعدارلاماسىنا قاتىستى ورتاق كەلىسىمگە كەلۋى ءتيىس.
Axios باسىلىمى قازىرگى كەزەڭدە قاقتىعىس تاراپتارىنىڭ 60 كۇن ىشىندە جانجالعا تولىقتاي نۇكتە قويا الاتىنى ازىرگە بەلگىسىز ەكەنىن اتاپ ءوتتى.
بۇعان دەيىن دونالد ترامپ يرانمەن مامىلەنىڭ نەگىزگى شارتتارى بويىنشا كەلىسىمگە كەلگەنىن مالىمدەگەن بولاتىن. ونىڭ ايتۋىنشا، تەك كەيبىر تۇستارىن پىسىقتاۋ قالعان. الايدا ول ءسوز جان-جاقتى كەلىسىم تۋرالى ما، الدە داۋلى ماسەلەلەردىڭ ءبىر بولىگىن شەشۋ جايىندا ما ەكەنىن ناقتىلامادى.
ەسە سالايىق، يران دا، اقش تا ەكى ەل اراسىنداعى كەلىسىمدى دايىنداۋ جۇمىستارى سوڭعى كەزەڭگە جەتكەنىن مالىمدەگەن بولاتىن. ال امەريكالىق باق جوبا 23 مامىر، سەنبى كۇنى تاڭەرتەڭ كەلىسىلگەنىن جانە ونىڭ 24 ساعات ىشىندە ۇسىنىلاتىنىن حابارلاعان.
