26 مامىردا پاۆلودار وبلىسىنىڭ باياناۋىل اۋدانىندا جەر سىلكىنىسى تىركەلدى، دەپ حابارلايدى "ادىرنا" ۇلتتىق پورتالى.
سەيسمولوگيالىق تاجىريبەلىك-ادىستەمەلىك ەكسپەديتسياسىنىڭ مالىمەتىنشە، جەر سىلكىنىسى ساعات 11:28-دە تىركەلگەن. سەيسميكالىق وقيعانى ستانتسيالار جەلىسى انىقتاعان. جەر سىلكىنىسىنىڭ ەپيتسەنترى باياناۋىل اۋدانى اۋماعىندا، باياناۋىل اۋىلى ماڭىندا ورنالاسقان. ول الماتى قالاسىنان سولتۇستىك-باتىسقا قاراي شامامەن 855 شاقىرىم قاشىقتىقتا بولعان.
سەيسميكالىق پارامەترلەرگە سايكەس جەر سىلكىنىسىنىڭ ماگنيتۋداسى 2 بالل، تەرەڭدىگى 30 شاقىرىم، ەنەرگەتيكالىق كلاسى 10.7 بولعان.
MSK-64 شكالاسى بويىنشا جەر سىلكىنىسىنىڭ سەزىلۋ دەڭگەيى باياناۋىل اۋدانىندا 2 بالل رەتىندە باعالانعان.
توتەنشە جاعدايلار مينيسترلىگىنىڭ مالىمەتىنشە، جاعدايدى باقىلاۋ جانە ۇيلەستىرۋ ماقساتىندا پاۆلودار وبلىسى تجد بازاسىندا جەدەل شتاب قۇرىلدى. رەسمي اقپاراتقا سايكەس، قيراۋ نەمەسە زارداپ شەككەندەر تۋرالى مالىمەت تۇسپەگەن. تىرشىلىكتى قامتاماسىز ەتۋ نىساندارى شتاتتىق رەجيمدە جۇمىس ىستەۋدە.
