پاۆلودار وبلىسىنىڭ تۇلەگى اسەت التاير 2026 جىلعى نەگىزگى ۇبت-دا ەڭ جوعارى ناتيجە كورسەتىپ، 140 بالل جينادى، دەپ حابارلايدى "ادىرنا" ۇلتتىق پورتالى.
بۇل تۋرالى عىلىم جانە جوعارى ءبىلىم مينيسترلىگىنىڭ ءباسپاسوز قىزمەتى حابارلادى. تالاپكەر تەستىلەۋدى 26 مامىر كۇنى پاۆلودار قالاسىنداعى ايماقتىق تەستىلەۋ ورتالىعىندا تاپسىرعان. ول «ماتەماتيكا–گەوگرافيا» پاندەر كومبيناتسياسىن تاڭداپ، بەس ءپان بويىنشا ماكسيمالدى ناتيجە كورسەتتى.
اسەت التاير — پاۆلودار قالاسىنداعى №7 جالپى ورتا ءبىلىم بەرۋ مەكتەبىنىڭ تۇلەگى. تۇلەك ءوز سوزىندە ۇبت-عا دايىندىقتى 11-سىنىپتىڭ باسىندا جۇيەلى تۇردە باستاعانىن ايتتى.
«مەن 11-سىنىپتىڭ باسىنان باستاپ ۇبت-عا جۇيەلى تۇردە دايىندالا باستادىم. ءدال سول كەزدە بولاشاق ماماندىعىمدى ناقتى تاڭدادىم. الداعى ۋاقىتتا Maqsut Narikbayev University ۋنيۆەرسيتەتىنە “مەنەدجمەنت” ماماندىعىنا وقۋعا ءتۇسۋدى جوسپارلاپ وتىرمىن. ۇبت-عا دايىندىق بارىسىندا قولداۋ كورسەتىپ، جىگەر بەرگەن اتا-اناما جانە ۇستازدارىما العىسىمدى بىلدىرەمىن»، – دەدى ول.
مينيسترلىك مالىمەتىنشە، نەگىزگى ۇبت باستالعالى ەكى اپتا ىشىندە 92 مىڭعا جۋىق تەستىلەۋ ارەكەتى تىركەلگەن. شەكتى بالدى تالاپكەرلەردىڭ 65 پايىزى جيناعان.
بەس ءپان بويىنشا ورتاشا ناتيجە 63 بالدى قۇرادى. سونىمەن قاتار نەگىزگى ۇبت-عا قاتىسۋ ءۇشىن 240 مىڭعا جۋىق تالاپكەر ەكى مۇمكىندىك بويىنشا جالپى سانى 446 مىڭنان استام ءوتىنىش بەرگەن.
