اقش پرەزيدەنتى ترامپ جىل سايىنعى مەديتسينالىق تەكسەرۋدەن ءوتتى، دەپ حابارلايدى "ادىرنا" ۇلتتىق پورتالى Gazeta-عا سىلتەپ.
دارىگەرلەردىڭ قورىتىندىسىنا سايكەس، مەملەكەت باسشىسى پرەزيدەنتتىك مىندەتتەرىن اتقارۋعا تولىق جارامدى.
تەكسەرۋ Walter Reed National Military Medical Center اسكەري-مەديتسينالىق ورتالىعىندا جۇرگىزىلگەن. ءۇش ساعاتقا سوزىلعان كەشەندى تەكسەرۋ بارىسىندا كومپيۋتەرلىك توموگرافيا، كارديولوگيالىق زەرتتەۋلەر مەن ونكولوگيالىق سكرينينگ وتكىزىلگەن. پرەزيدەنتتىڭ دەنساۋلىعىن 22 بەيىندى مامان باعالاعان. الايدا مەديتسينالىق ەسەپتە بىرقاتار ەسكەرتۋلەر دە كورسەتىلدى.
دارىگەرلەردىڭ مالىمەتىنشە، سوڭعى ءبىر جىلدا دونالد ترامپتىڭ سالماعى 6 كەلىگە ارتقان. قازىر ونىڭ سالماعى 108 كەلىنى قۇرايدى.
بويى 190 سانتيمەتر بولاتىن پرەزيدەنتتىڭ دەنە سالماعىنىڭ يندەكسى 29,7 كورسەتكىشىنە جەتكەن. بۇل كورسەتكىش سەمىزدىك شەگىنە وتە جاقىن سانالادى. سەبەبى كلينيكالىق سەمىزدىك دسي 30-دان اسقاندا انىقتالادى. وسىعان بايلانىستى ماماندار پرەزيدەنتكە تاماقتانۋ راتسيونىن قايتا قاراپ، ارتىق سالماقتان ارىلۋدى جانە دەنە بەلسەندىلىگىن ارتتىرۋدى ۇسىنعان.
ال ترامپتىڭ قولىنداعى كوگەرگەن ىزدەرى ءجيى قول الىسۋ كەزىندە جۇمساق تىندەردىڭ تىتىركەنۋى سەبەپ بولعانى ايتىلدى.
سونىمەن قاتار پرەزيدەنت جۇرەك-قان تامىرلارى اۋرۋلارىنىڭ الدىن الۋ ءۇشىن اسپيرين قابىلدايدى. بۇل پرەپارات قاندى سۇيىلتاتىندىقتان، كوگەرۋلەردىڭ ءجيى پايدا بولۋىنا اسەر ەتۋى مۇمكىن. سوندىقتان دارىگەرلەر اسپيرين مولشەرىن ازايتۋدى ۇسىنعان.
مەديتسينالىق ەسەپتە پرەزيدەنتتە سوزىلمالى ۆەنالىق جەتكىلىكسىزدىك بەلگىلەرى بار ەكەنى دە ايتىلعان. بۇل – جاس ۇلعايعان سايىن ءجيى كەزدەسەتىن اۋرۋلاردىڭ ءبىرى.
ماماندار اياقتىڭ تومەنگى بولىگىندە ازداپ ءىسىنۋ بايقالعانىن راستاعانىمەن، ونىڭ جاعدايى وتكەن جىلمەن سالىستىرعاندا جاقسارعانىن اتاپ ءوتتى.
