جىل باسىنان بەرى ەل اۋماعىندا شامامەن 400 ۆەلوسيپەد ۇرلانعان. بۇل تۋرالى polisia.kz جازدى، دەپ حابارلايدى «ادىرنا» ءتىلشىسى.
رەسمي مالىمەتتەرگە سۇيەنسەك، ولاردىڭ جارتىسىنان استامى تابىلىپ، يەلەرىنە قايتارىلعان.
ۇرلىقتار كوبىنە تۇنگى ۋاقىتتا كوپقاباتتى ۇيلەردىڭ كىرەبەرىستەرىندە، باسپالداق الاڭدارىندا جانە تۇرعىن ۇيلەردىڭ اۋلالارىندا جاسالادى. پوليتسەيلەردىڭ ايتۋىنشا، ۆەلوسيپەد يەلەرىنىڭ ءوزى قىلمىسقا قولايلى جاعداي جاساپ، مۇلىكتەرىن قاراۋسىز قالدىرادى نەمەسە سەنىمسىز قۇلىپتاردى قولدانادى.
ءتارتىپ ساقشىلارى بىرنەشە قاراپايىم قاۋىپسىزدىك ەرەجەسىن ۇستانۋعا شاقىردى.
«عيماراتقا كىرەتىن جاعدايدا ۆەلوسيپەدتى ىشكە الىپ كىرۋ نەمەسە راماسى مەن ارتقى دوڭعالاعىنا بىردەن قۇلىپ ورناتۋ ۇسىنىلادى. مىقتى قورعانىس ءۇشىن بولاتتان جاسالعان شىنجىرلى قۇلىپ نەمەسە U-lock قاپسىرما-قۇلىپ قولدانۋ ۇسىنىلادى. سونداي-اق ۆەلوسيپەدتى تەك كۇزەتىلەتىن تۇراقتارعا نەمەسە بەينەباقىلاۋ كامەراسى ورناتىلعان ايماقتارعا قالدىرعان دۇرىس. كولىك يەلەرىنە الدىن الا ۆەلوسيپەدتى نەمەسە راماداعى سەريالىق ءنومىردى سۋرەتكە ءتۇسىرىپ الۋ جانە ونىڭ ەرەكشە بەلگىلەرىن ەستە ساقتاۋ ۇسىنىلادى»،– دەلىنگەن حابارلامادا.
ايتا كەتەيىك، بۇگىن، 3 ماۋسىم – دۇنيەجۇزىلىك ۆەلوسيپەد كۇنى. بۇل كۇندى بۇۇ باس اسسامبلەياسى 2018 جىلى ۆەلوسيپەدتى ەكولوگيالىق تازا، قول جەتىمدى جانە پايدالى كولىك ءتۇرى رەتىندە تانىمال ەتۋ ءۇشىن قۇردى.
