قىرعىزستان ءوز تاريحىندا العاش رەت بۇۇ قاۋىپسىزدىك كەڭەسىنىڭ تۇراقتى ەمەس مۇشەسى بولىپ سايلاندى. رەسپۋبليكا 2027–2028 جىلدارى وسى الەمدىك ۇيىمنىڭ نەگىزگى ورگاندارىنىڭ ءبىرىنىڭ قۇرامىنا ەنەدى، دەپ حابارلايدى «ادىرنا» ءتىلشىسى 24.kg-عا سىلتەمە جاساپ.
داۋىس بەرۋ 3 ماۋسىمدا نيۋ-يوركتە وتكەن بۇۇ باس اسسامبلەياسىنىڭ وتىرىسىندا ءوتتى. قىرعىزستان 4-تۋردا 142 داۋىس جيناپ، ازيا-تىنىق مۇحيتى ءوڭىرى ەلدەرى توبىنان ءبىر ورىنعا تالاسقان ءفيليپپيندى باسىپ وزدى.
سايلاۋ قورىتىندىسى بويىنشا بۇۇ قاۋىپسىزدىك كەڭەسىنىڭ قۇرامىنا باتىس ەۋروپا جانە وزگە مەملەكەتتەر توبىنان اۆستريا مەن پورتۋگاليا، لاتىن امەريكاسى جانە كاريب باسسەينى ەلدەرى توبىنان ترينيداد پەن توباگو، سونداي-اق افريكا مەملەكەتتەرى توبىنان زيمبابۆە دە ەنەدى. سايلانۋ ءۇشىن ەلدەر بۇۇ-عا مۇشە مەملەكەتتەردىڭ ۇشتەن ەكىسىنىڭ، ياعني كەمىندە 127 داۋىستىڭ قولداۋىنا يە بولۋى قاجەت بولدى.
قاۋىپسىزدىك كەڭەسىنىڭ قۇرامىنا 15 مەملەكەت كىرەدى. ونىڭ بەسەۋى – ۇلىبريتانيا، قىتاي، رەسەي، اقش جانە فرانتسيا – ۆەتو قۇقىعىنا يە تۇراقتى مۇشەلەر. قالعان ون مەملەكەت ەكى جىلدىق مەرزىمگە سايلانادى. 2026 جىلدىڭ سوڭىندا تۇراقتى ەمەس بەس مۇشەنىڭ – گرەكيا، دانيا، پاكىستان، پاناما جانە ءسوماليدىڭ وكىلەتتىك مەرزىمى اياقتالادى. ولاردىڭ ورنىنا بۇگىن سايلانعان ەلدەر كەلەدى.
قاۋىپسىزدىك كەڭەسى – حالىقارالىق بەيبىتشىلىك پەن قاۋىپسىزدىكتى ساقتاۋعا نەگىزگى جاۋاپتى ورگان. كەيبىر جاعدايلاردا كەڭەس حالىقارالىق بەيبىتشىلىك پەن قاۋىپسىزدىكتى قولداۋ نەمەسە قالپىنا كەلتىرۋ ماقساتىندا سانكتسيالار ەنگىزۋى نەمەسە كۇش قولدانۋعا رۇقسات بەرۋى مۇمكىن.
