الماتىدا «رۋبەج» بەكەتتەرى 1,5 مىڭعا جۋىق قۇقىق بۇزۋشىلىقتى انىقتادى
الماتى قالاسىنىڭ نەگىزگى كىرەبەرىستەرىندە ورناتىلعان «رۋبەج» بەكەتتەرىنىڭ جۇمىسى جالعاسۋدا. جاڭارتىلعان فورمات ىسكە قوسىلعالى بەرى شامامەن 1,5 مىڭ قۇقىق بۇزۋشىلىق انىقتالعان. ولاردىڭ قاتارىندا تىيىم سالىنعان زاتتاردى تاسىمالداۋ جانە جول قوزعالىسى ەرەجەلەرىن بۇزۋ فاكتىلەرى بار، دەپ حابارلايدى “ادىرنا” ۇلتتىق پورتالى Polisia.kz-كە سىلتەپ.
وسى ۋاقىت ىشىندە كولىك قۇرالدارىنىڭ ۋىتتىلىق جانە ءتۇتىن شىعارۋ نورمالارىن اسىرۋدىڭ 500-گە جۋىق دەرەگى تىركەلگەن. سونىمەن قاتار، 88 جۇرگىزۋشى كولىك قۇرالىن قۇجاتسىز باسقارعانى ءۇشىن جاۋاپقا تارتىلسا، 125 كولىك تەحنيكالىق بايقاۋدان وتپەي پايدالانىلعانى انىقتالعان. تاعى 61 جۇرگىزۋشى ساقتاندىرۋ ءپوليسىنىڭ بولماۋىنا بايلانىستى جاۋاپكەرشىلىككە تارتىلىپ، 122 ادام قاۋىپسىزدىك بەلدىگىن تاقپاعانى ءۇشىن جازالانعان. سونداي-اق مەملەكەتتىك تىركەۋ ءنومىرىنسىز جۇرگەن 7 كولىك انىقتالدى.
تەكسەرۋ بارىسىندا بارلىعى 111 تىيىم سالىنعان زات تاركىلەندى. ونىڭ ىشىندە 109 سۋىق قارۋ جانە 2 اتىس قارۋى بولعان.
الماتى قالاسى پوليتسياسى اكىمشىلىك پوليتسيا باسقارماسىنىڭ باستىعى ءابدينۇر تاسىباەۆ «رۋبەج» بەكەتتەرى قالاعا كىرەتىن جولدارداعى كەشەندى قاۋىپسىزدىك سۇزگىسى قىزمەتىن اتقاراتىنىن ايتتى.
ونىڭ سوزىنشە، بۇل جۇيە كولىكتەردىڭ تەحنيكالىق اقاۋلارىن، زاڭنامانى ورەسكەل بۇزۋ فاكتىلەرىن جانە تىيىم سالىنعان زاتتاردى تاسىمالداۋ جاعدايلارىن ءبىر مەزەتتە انىقتاۋعا مۇمكىندىك بەرەدى. بۇل ءوز كەزەگىندە قوعامدىق قاۋىپسىزدىك دەڭگەيىن ارتتىرۋعا ىقپال ەتەدى.
پوليتسيا وكىلدەرى «رۋبەج» بەكەتتەرىنىڭ جۇمىسى تۇراقتى نەگىزدە جالعاساتىنىن جانە پروفيلاكتيكالىق شارالار ودان ءارى كۇشەيتىلەتىنىن مالىمدەدى.
