الماتىنىڭ تۇركسىب اۋدانىندا جالدامالى پاتەرلەردىڭ بىرىنەن 32 جاستاعى ەر ادامنىڭ ءمايىتى تابىلدى. پوليتسەيلەر قىلمىسقا كۇدىكتىنى بىرنەشە ساعات ىشىندە ۇستاپ، ۋاقىتشا ۇستاۋ يزولياتورىنا قامادى. بۇل تۋرالى قالالىق پوليتسيا دەپارتامەنتى مالىمدەدى، دەپ حابارلايدى “ادىرنا”.
مالىمەتكە سايكەس، تۇركسىب اۋدانىندا ەر ادامنىڭ ءمايىتى تابىلعانى تۋرالى حابار تۇسكەننەن كەيىن وقيعا ورنىنا جەدەل-تەرگەۋ توبى بارعان.
ءتارتىپ ساقشىلارى قىسقا ۋاقىت ىشىندە مارقۇمنىڭ ارالاسقان ادامدارىن انىقتاپ، كۇدىكتىگە شىققان.
تەرگەۋدىڭ الدىن الا نۇسقاسىنا سايكەس، وقيعا الدىندا ەكى ەر ادام بىرگە ىشىمدىك ىشكەن. كەيىن ولاردىڭ اراسىندا جانجال تۋىنداعان.
پوليتسيانىڭ مالىمەتىنشە، كۇدىكتى جانجال كەزىندە ەر ادامعا ولىمگە اكەلگەن دەنە جاراقاتتارىن سالعان.
تەرگەۋ دەرەكتەرىنە سايكەس، كۇدىكتى كەيىن قىلمىستىڭ ءىزىن جاسىرۋعا ارەكەت جاساعان.
ول ءمايىتتى ازىق-تۇلىك پلەنكاسىمەن وراپ، باسقا جەرگە الىپ كەتۋدى جوسپارلاعان. الايدا بۇل ويىن جۇزەگە اسىرىپ ۇلگەرمەگەن.
پوليتسيا قىزمەتكەرلەرى ءمايىت تابىلعاننان كەيىن بىرنەشە ساعات ىشىندە كۇدىكتىنى قولعا تۇسىرگەن.
قازىرگى ۋاقىتتا ول ۋاقىتشا ۇستاۋ يزولياتورىنا قامالدى. اتالعان فاكتى بويىنشا سوتقا دەيىنگى تەرگەۋ جۇرگىزىلىپ جاتىر.
