پەتروپاۆل قالاسىندا وتباسىلىق جانجال كەزىندە اناسىن پىشاقتاعان 34 جاستاعى ايەلگە قاتىستى سوت ۇكىمى شىقتى. سوت شەشىمىمەن الماگۇل قوجىموۆا 9 جىلعا باس بوستاندىعىنان ايىرىلدى، دەپ حابارلايدى "ادىرنا".
قايعىلى وقيعا وتكەن جىلدىڭ 17 قازانىندا زارەچنىي كەنتىندە بولعان. اۆتوبۋس ايالداماسى ماڭىنان 57 جاستاعى ايەلدىڭ ءمايىتى تابىلعان. تەرگەۋ بارىسىندا ونىڭ ولىمىنە تۋعان قىزىنىڭ قاتىسى بارى انىقتالدى.
ءىس ماتەريالدارىنا سايكەس، اناسى قىزىنىڭ ۇيىندە ۋاقىتشا تۇرعان. ەكەۋىنىڭ اراسىندا اقشا ماسەلەسىنە بايلانىستى جانجال تۋىنداپ، سونىڭ بارىسىندا قىزى اناسىنىڭ كەۋدە تۇسىنا پىشاق جاراقاتىن سالعان.
جارالانعان ايەل وقيعادان كەيىن پاتەردەن شىعىپ، تانىستارىنا قاراي جاياۋ كەتكەن. الايدا جولدا جاعدايى ناشارلاپ، اۆتوبۋس ايالداماسىنىڭ جانىندا ەسىنەن تانىپ قالعان. كەيىن سول جەردە كوز جۇمعان.
ءىس جارتى جىلعا جۋىق تەرگەلدى. وسى ۋاقىت ىشىندە ايىپتالۋشى تەرگەۋ يزولياتورىندا قاماۋدا بولعان. سوت وتىرىسىندا ول كىناسىن ءىشىنارا عانا مويىنداعان.
وبلىستىق سوتتىڭ مالىمەتىنشە، سوتتالۋشىنىڭ كىناسى كۋاگەرلەردىڭ جاۋاپتارى مەن ساراپتاما قورىتىندىلارى ارقىلى تولىق دالەلدەنگەن.
پروكۋرور ايەلدى 9 جىلعا باس بوستاندىعىنان ايىرۋدى سۇراعان. ال جابىرلەنۋشى تاراپ وعان جەڭىلىرەك جازا تاعايىنداۋدى وتىنگەن.
قىلمىستىق ءىس «دەنساۋلىققا قاساقانا اۋىر زيان كەلتىرۋ، ابايسىزدا جابىرلەنۋشىنىڭ ولىمىنە اكەپ سوعۋ» بابى بويىنشا قارالدى. اتالعان باپ 8 جىلدان 12 جىلعا دەيىن باس بوستاندىعىنان ايىرۋ جازاسىن قاراستىرادى.
سوت ايىپتالۋشىنىڭ جاساعان ىسىنە وكىنەتىنىن جانە ونىڭ كامەلەتكە تولماعان 13 جاستاعى ۇلى بارىن جەڭىلدەتەتىن ءمان-جاي رەتىندە ەسكەردى. اۋىرلاتاتىن جاعدايلار انىقتالماعان.
ناتيجەسىندە ايەل ورتاشا قاۋىپسىزدىك مەكەمەسىندە جازاسىن وتەۋ ءۇشىن 9 جىلعا سوتتالدى. ۇكىم ازىرگە زاڭدى كۇشىنە ەنگەن جوق.
