قازاقستاندا زاڭسىز اينالىمداعى قارۋ-جاراق پەن وق-دارىلەردى انىقتاۋ جانە تاركىلەۋ جۇمىستارى جالعاسىپ جاتىر. شىمكەنت پەن پەتروپاۆل قالالارىندا قارۋ-جاراق جاسىرىلعان ورىندار تابىلدى، دەپ حابارلايدى "ادىرنا".
ىشكى ىستەر جانە ۇلتتىق قاۋىپسىزدىك ورگاندارى زاڭسىز ساقتالعان قارۋ-جاراق پەن وق-دارىلەردى انىقتاۋ بويىنشا بىرلەسكەن ءىس-شارالار جۇرگىزىپ جاتىر.
شىمكەنت قالاسىنىڭ تۇران اۋدانىندا اۆتوموبيل جولىنىڭ ماڭىنداعى ارىقتان قارۋ-جاراق جاسىرىلعان ورىن انىقتالدى. ول جەردەن ءۇش اڭشىلىق مىلتىق، شولاق مىلتىق جانە تاپانشا تاركىلەندى. تەكسەرۋ بارىسىندا قارۋدىڭ ءبىرىنىڭ 2022 جىلعى قاڭتار وقيعاسى كەزىندە الماتىداعى قارۋ-جاراق دۇكەنىنەن ۇرلانعانى انىقتالدى.
ال پەتروپاۆل قالاسىندا اشىق اۋماقتان اڭشىلىق مىلتىق، نومىرلەرى وشىرىلگەن ەكى شولاق مىلتىق، وق وتپەيتىن كەۋدەشە جانە 27 وق-ءدارى تابىلدى.
ىشكى ىستەر مينيسترلىگى زاڭسىز ساقتالعان قارۋدى ءوز ەركىمەن تاپسىرعان ازاماتتار قىلمىستىق جانە اكىمشىلىك جاۋاپكەرشىلىكتەن بوساتىلاتىنىن ەسكە سالدى.
بۇدان بولەك، 20 ساۋىردەن باستاپ جىل سوڭىنا دەيىن حالىقتان زاڭسىز ساقتالعان اتىس قارۋىن، وق-دارىلەر مەن جارىلعىش زاتتاردى ساتىپ الۋ اكتسياسى وتكىزىلىپ جاتىر. بۇگىنگە دەيىن ازاماتتار شامامەن 900 قارۋ مەن 6 مىڭعا جۋىق وق-ءدارىنى تاپسىرعان.
