كيەۆتە قازاقستاننان ەسىرتكى جاسىرۋشىلاردى تارتۋمەن اينالىسقان call-ورتالىقتاردىڭ جەلىسى جويىلدى. بۇل تۋرالى ىشكى ىستەر مينيسترلىگى ايتتى، دەپ حابارلايدى «ادىرنا» ءتىلشىسى.
«28 مامىردا كيەۆ قالاسىندا ەۋروپا مەن تمد ەلدەرىندە سينتەتيكالىق ەسىرتكى ءوندىرۋ جانە تاراتۋمەن اينالىسقان قىلمىستىق ۇيىمعا تيەسىلى call-ورتالىقتاردىڭ قىزمەتى توقتاتىلدى. تەرگەۋ بارىسىندا بۇل ورتالىقتاردىڭ ادامداردى ەسىرتكى بيزنەسىنە تارتۋ ءۇشىن پايدالانىلعانى انىقتالدى. وپەراتورلار مەن مەنەدجەرلەر قازاقستان اۋماعىندا ەسىرتكى جاسىرۋشى جانە ەسىرتكى وراۋشى رولىنە ادامداردى ىزدەپ، ولاردى زاڭسىز جۇمىسقا قابىلداعان»،– دەدى قر ءىىم ەسىرتكى قىلمىسىنا قارسى ءىس-قيمىل كوميتەتى توراعاسىنىڭ ورىنباسارى ەلدار ابدىكەنوۆ.
ارنايى وپەراتسيا ناتيجەسىندە 11 ادام ۇستالعان. ولاردىڭ اراسىندا ۇيىمداستىرۋشىلار، وپەراتورلار جانە ادامداردى زاڭسىز جۇمىسقا تارتۋمەن اينالىسقان قىزمەتكەرلەر بار. توعىز مەكەنجايدا ءتىنتۋ جۇرگىزىلىپ، شامامەن 40 مىڭ اقش دوللارى، 10 مىڭ ەۋرو، Range Rover اۆتوكولىگى، 18 ۇيالى تەلەفون، 12 نوۋتبۋك پەن پلانشەت تاركىلەنگەن.
«قازىر تاركىلەنگەن تەحنيكاداعى مالىمەتتەر زەرتتەلىپ جاتىر. سونىمەن قاتار ۇيىمداستىرۋشىلاردىڭ اككاۋنتتارى انىقتالىپ، قارجىلىق تەرگەۋ جۇرگىزىلۋدە»،– دەدى سپيكەر.
