قوستاناي وبلىسىندا جىل باسىنان بەرى زاڭسىز اينالىمنان 230 كيلوگرامم ەسىرتكى تاركىلەنىپ، 180 ەسىرتكى سايتى مەن 100 گراففيتي-جازۋ جويىلىپ، 2,9 مىڭ بانك شوتى بۇعاتتالدى، دەپ حابارلايدى "ادىرنا".
باس پروكۋراتۋرانىڭ مالىمەتىنشە، قىلمىستىق قۋدالاۋ اياسىندا ەكىنشى دەڭگەيلى بانكتەردەگى جالپى سوماسى 194 ملن تەڭگە بولاتىن قاراجاتقا سوت شەشىمىمەن تىيىم سالىندى. قىلمىستىق جاۋاپقا 33 ادام تارتىلدى، ونىڭ ىشىندە 13-ءى – ەسىرتكى زاتتارىن وتكىزگەنى ءۇشىن، 2-ەۋى –جارنامالاعانى ءۇشىن.
بەلگىلى بولعانداي، بيىل 20 ءساۋىر كۇنى جىتىقارا قالاسىنىڭ تۇرعىنى ينتەرنەت ارقىلى ەسىرتكى جارنامالاپ، ونى ساتقانى ءۇشىن كىنالى دەپ تانىلدى. وسى قىلمىسى ءۇشىن ول 7 جىلعا باس بوستاندىعىنان ايىرىلدى. ۇكىم زاڭدى كۇشىنە ەندى.
«تەرگەۋ ماتەريالدارىنا سايكەس، سوتتالعان ايەل «Telegram» مەسسەندجەرى ارقىلى ەسىرتكى ساتۋمەن اينالىسقان ينتەرنەت-دۇكەننىڭ جۇمىسىنا بەلسەندى ارالاسقان. سونىمەن قاتار، ول SMM-مەنەدجەر قىزمەتىن اتقارىپ، «Telegram» مەسسەندجەرىندە، «TikTok» جانە «Instagram» الەۋمەتتىك جەلىلەرىندە ەسىرتكى دۇكەنىن ۇيىمداستىرۋشىلاردىڭ مۇددەسى ءۇشىن ەسىرتكى تاراتۋشىلاردى تارتۋ ماقساتىندا «تابىس تابۋ» تۋرالى حابارلاندىرۋلاردى جۇيەلى تۇردە جاريالاپ وتىرعان. ءتىنتۋ بارىسىندا ونىڭ تۇرعىلىقتى جەرىنەن 790 گرامنان استام سينتەتيكالىق ەسىرتكى تاركىلەندى»، – دەلىنگەن پروكۋراتۋرانىڭ حابارلاماسىندا.
قۇقىق قورعاۋ، ارنايى جانە جەرگىلىكتى اتقارۋشى ورگانداردىڭ بىرلەسكەن جۇمىسىنىڭ ناتيجەسىندە وڭىردە ەسىرتكى قىلمىستارىنىڭ سانى 213-تەن 134-كە دەيىن، ياعني 37 %-عا تومەندەدى. اتاپ ايتقاندا، ەسىرتكى ساقتاۋ فاكتىلەرى 101-دەن 61-گە دەيىن، ال وتكىزۋ فاكتىلەرى 69-دان 41-گە دەيىن ازايدى.
