2026 جىلدىڭ قاڭتار-ناۋرىز ايلارىنىڭ قورىتىندىسى بويىنشا وزبەكستان تۋريستەر اعىنىنىڭ ءوسۋ قارقىنى جونىنەن الەمدەگى كوشباسشى ەلدەردىڭ قاتارىنا ەندى. ەسەپتى كەزەڭدە رەسپۋبليكاعا كەلگەن شەتەلدىك كەلۋشىلەر سانى وتكەن جىلدىڭ ءبىرىنشى توقسانىمەن سالىستىرعاندا 37 پايىزعا ارتقان. بۇل مالىمەتتەر بۇۇ جانىنداعى دۇنيەجۇزىلىك تۋريزم ۇيىمىنىڭ (UN Tourism) ساراپشىلارى دايىنداعان باياندامادا جاريالاندى، دەپ حابارلايدى “ادىرنا”.
اتالعان رەيتينگتە وزبەكستان تىنىق مۇحيتىنداعى ارالدىق مەملەكەت – پالاۋمەن بىرگە تۋريستەر سانىنىڭ ءوسۋى بويىنشا العاشقى بەستىككە كىردى. پالاۋدا دا كەلۋشىلەر سانى 37 پايىزعا كوبەيگەن.
رەيتينگتىڭ جوعارعى ورىندارىندا:
- پاراگۆاي – +46%;
- جاڭا كالەدونيا – +45%;
- سالۆادور – +43%;
- موڭعوليا – +39%.
شەتەلدىك تۋريستەردەن تۇسكەن تابىس كولەمى بويىنشا قاراستىرعاندا، ەكى تاڭبالى ءوسىم كورسەتكەن ەلدەر قاتارىنا مىنالار ەندى:
- پاكىستان – +60%;
- وڭتۇستىك كورەيا – +38%;
- ماروككو – +24%;
- برۋنەي – +22%;
- برازيليا – +12%.
جالپى العاندا، 2026 جىلدىڭ ءبىرىنشى توقسانىندا حالىقارالىق ساپارعا شىققان ادامدار سانى شامامەن 307 ميلليونعا جەتىپ، وتكەن جىلدىڭ وسى كەزەڭىمەن سالىستىرعاندا 2 پايىزعا وسكەن. وسى كورسەتكىشپەن سالىستىرعاندا وزبەكستانداعى تۋريستەر اعىنىنىڭ 37 پايىزدىق ءوسىمى ايتارلىقتاي جوعارى ناتيجە بولىپ وتىر.
بايانداما اۆتورلارىنىڭ مالىمەتىنشە، جىل باسىندا الەمدىك تۋريستىك اعىمنىڭ ءوسىمى 2,5 پايىزدى قۇراعان. الايدا 28 اقپاندا باستالعان تاياۋ شىعىستاعى قاقتىعىس جاعدايعا كەرى اسەرىن تيگىزدى. ناتيجەسىندە ناۋرىز ايىندا ءوسىم ساقتالعانىمەن، كورسەتكىش 0,4 پايىزعا دەيىن تومەندەگەن.
ماسەلە تەك اۋە قاتىناسىنىڭ شەكتەلۋىندە ەمەس. ايماق ەلدەرىنە جەتۋ قيىنداپ، شەتەلدىك تۋريستەردىڭ كەلۋى 14 پايىزعا ازايعان. يراننىڭ اقش پەن يزرايلمەن قارۋلى تەكەتىرەسى مۇناي باعاسىنىڭ كۇرت قىمباتتاۋىنا جانە اۆياتسيالىق وتىن تاپشىلىعىنا اكەلدى. سونىڭ سالدارىنان اۋە بيلەتتەرىنىڭ باعاسى ءوسىپ، رەيستەردىڭ وتكىزۋ مۇمكىندىگى تومەندەدى.
بۇۇ تۋريزم جونىندەگى باس حاتشىسى شەيحا ال-نۋۆايس بۇل جاعدايعا قاتىستى:
«تاياۋ شىعىستا جالعاسىپ جاتقان قاقتىعىس تۋريستىك اعىندارعا تەك ءوڭىر ىشىندە عانا ەمەس، ودان تىس جەرلەردە دە اسەر ەتۋدە. اسىرەسە كولىك پەن ورنالاستىرۋ سالالارىنداعى ينفلياتسيانىڭ ءوسۋى بايقالادى. بۇل جاعداي ساياحاتشىلارعا، كاسىپكەرلەرگە جانە تۋريستىك باعىتتارعا قوسىمشا قىسىم تۇسىرۋدە. سونىمەن قاتار ءتۋريزمنىڭ ەكونوميكانى قولداۋ، جاڭا مۇمكىندىكتەر قۇرۋ جانە جەرگىلىكتى قاۋىمداستىقتاردى ساقتاۋ ىسىندەگى ماڭىزدى ءرولىن تاعى ءبىر مارتە دالەلدەيدى»، – دەدى.
قازىرگى كۇردەلى گەوساياسي جاعدايعا بايلانىستى ساراپشىلار الداعى كەزەڭگە ساقتىقپەن بولجام جاساپ وتىر. بۇعان دەيىن 2026 جىلى تۋريستىك اعىن 3–4 پايىزعا وسەدى دەپ كۇتىلسە، قازىر بۇل بولجام 1–2 پايىزدىق تارماققا تومەندەتىلدى.
سوعان قاراماستان، مامانداردىڭ باسىم بولىگى ماۋسىم-شىلدە ايلارىندا رەيتينگ كوشباسشىسى سولتۇستىك امەريكا بولادى دەپ ەسەپتەيدى. ويتكەنى اقش، كانادا جانە مەكسيكا قابىلدايتىن فۋتبولدان الەم چەمپيوناتى الەمنىڭ تۇكپىر-تۇكپىرىنەن كوپتەگەن جانكۇيەردى تارتاتىنى ءسوزسىز.
