قازاقستان ميگرانتتار ءۇشىن قونىس اۋدارىپ، ءومىر سۇرۋگە ەڭ قولايلى تمد ەلدەرى رەيتينگىندە كوش باستادى. امەريكالىق Remitly كومپانياسى دايىنداعان Immigration Index 2026 حالىقارالىق زەرتتەۋىنە سايكەس، رەسپۋبليكا پوستكەڭەستىك كەڭىستىكتەگى مەملەكەتتەر اراسىندا ءبىرىنشى ورىنعا شىقتى، دەپ حابارلايدى «ادىرنا» ءتىلشىسى.
الەمنىڭ 82 ەلىن قامتىعان جاھاندىق رەيتينگتە قازاقستان 53-ورىنعا يە بولىپ، وڭىردەگى بارلىق كورشى ەلدى باسىپ وزدى. ودان كەيىن مولدوۆا (56-ورىن), ازەربايجان (66-ورىن), ارمەنيا (74-ورىن) جانە وزبەكستان (75-ورىن) ورنالاسقان. ال رەسەي, بەلارۋس, قىرعىزستان, تاجىكستان جانە ۋكراينا زەرتتەۋگە ەنگىزىلمەگەن.
رەيتينگ اۆتورلارى ەلدەردى 16 ساناتقا بىرىكتىرىلگەن 34 كورسەتكىش بويىنشا باعالاعان. نەگىزگى كريتەريلەر قاتارىندا قاۋىپسىزدىك، دەنساۋلىق ساقتاۋ مەن ءبىلىم بەرۋ ساپاسى، ەكولوگيالىق احۋال، جۇمىسپەن قامتىلۋ مۇمكىندىكتەرى، ءومىر ءسۇرۋ قۇنى، تۇرعىن ءۇيدىڭ قولجەتىمدىلىگى، قوعامدىق كولىكتىڭ دامۋى، سونداي-اق وتباسىلار مەن ميگرانتتارعا جاسالعان جاعدايلار بار.
Remitly كومپانياسىنىڭ مالىمەتىنشە، يندەكستى ازىرلەۋ بارىسىندا ەكونوميكالىق كورسەتكىشتەرمەن قاتار، ەلدەگى جايلى ءومىر ءسۇرۋ دەڭگەيى، قاۋىپسىزدىك جانە كوشىپ كەلۋشىلەردىڭ ۇزاق مەرزىمدى بەيىمدەلۋ مۇمكىندىكتەرى دە ەسكەرىلگەن.
الەمدىك رەيتينگتىڭ كوشىن شۆەيتساريا باستادى. دەگەنمەن، تمد ەلدەرى اراسىندا ءومىر ءسۇرۋ مەن جۇمىس ىستەۋ ءۇشىن ەل تاڭداۋدا ميگرانتتار اسا ماڭىزدى دەپ سانايتىن كورسەتكىشتەردىڭ جيىنتىعى بويىنشا ەڭ جوعارى باعا قازاقستانعا بەرىلدى.
