قازاقستان سەناتى «قازاقستان رەسپۋبليكاسىنىڭ جاڭا كونستيتۋتسياسىنىڭ قابىلدانۋىنا بايلانىستى راقىمشىلىق جاساۋ تۋرالى» زاڭدى ماقۇلدادى، دەپ حابارلايدى “ادىرنا”.
قۇجاتتى پارلامەنت دەپۋتاتتارى باستاماشىلىق ەتىپ ازىرلەگەن جانە قىلمىستىق ساياساتتى ىزگىلەندىرۋگە باعىتتالعان. زاڭ قاسىم-جومارت توقاەۆ تاپسىرماسى بويىنشا دايىندالعان.
جاڭا كونستيتۋتسيانىڭ قابىلدانۋىنا بايلانىستى جاريالانعان راقىمشىلىق قازاقستانداعى 15 مىڭنان استام سوتتالعان ادامدى قامتيدى. قىلمىستىق تەرىس قىلىقتار مەن ونشا اۋىر ەمەس قىلمىستار جاساعان ازاماتتار قىلمىستىق جاۋاپكەرشىلىكتەن جانە نەگىزگى جازادان بوساتىلادى.
سونداي-اق تاۋەلسىز قازاقستان تاريحىندا العاش رەت اكىمشىلىك راقىمشىلىق قاراستىرىلعان. وعان سايكەس ازاماتتار، جەكە كاسىپكەرلەر، نوتاريۋستار، ادۆوكاتتار، جەكە سوت ورىنداۋشىلارى جانە زاڭ كونسۋلتانتتارى ورىندالماعان اكىمشىلىك ايىپپۇلداردى تولەۋدەن بوساتىلادى.
الايدا زاڭنىڭ كۇشى تەرروريزم جانە ەكسترەميزم قىلمىستارى، سىبايلاس جەمقورلىق، ۇيىمداسقان قىلمىستىق توپتارعا قاتىسۋ، ازاپتاۋ، كامەلەتكە تولماعانداردىڭ جىنىستىق تيىسپەۋشىلىگىنە قارسى قىلمىستار ءۇشىن سوتتالعاندارعا، سونداي-اق قايتالاما قىلمىس جاساعاندارعا، ءومىر بويىنا باس بوستاندىعىنان ايىرىلعاندارعا جانە سىرتتاي سوتتالعاندارعا قولدانىلمايدى.
الدىن الا ەسەپتەۋلەر بويىنشا، زاڭنىڭ كۇشى 15,3 مىڭنان استام ادامعا تارالادى. ونىڭ ىشىندە شامامەن 4,5 مىڭ ادام جازادان تولىق بوساتىلسا، تاعى 10,8 مىڭ ادامنىڭ جازا مەرزىمى نەمەسە جازا كولەمى قىسقارتىلادى.
بۇعان دەيىن پرەزيدەنت قاسىم-جومارت توقاەۆ راقىمشىلىق قوعام مەن مەملەكەت قاۋىپسىزدىگىنە قاتەر توندىرمەيتىن قۇقىق بۇزۋشىلىقتارعا قاتىستى قولدانىلاتىنىن اتاپ وتكەن ەدى.
