بۇگىن، 12 ماۋسىم كۇنى استانادا AMANAT پارتياسىنىڭ كەزەكتى XXVI سەزى ءوز جۇمىسىن باستادى. وعان ەلىمىزدىڭ بارلىق وڭىرلەرىنەن كەلگەن دەلەگاتتار قاتىسۋدا، دەپ حابارلايدى "ادىرنا".
سەزد بارىسىندا ەسەپتى كەزەڭدەگى ساياسي كەڭەس پەن ورتالىق باقىلاۋ-تەكسەرۋ كوميسسياسىنىڭ جۇمىسىنىڭ قورىتىندىلارى قارالىپ، پارتيا قىزمەتىنىڭ الداعى باسىم باعىتتارى تالقىلانۋدا.
جيىنعا پارتيا مۇشەلەرى، ءماجىلىس دەپۋتاتتارى جانە وڭىرلىك ۇيىمداردىڭ وكىلدەرى قاتىسىپ، ءوز پىكىرلەرىن ءبىلدىردى.
ءماجىلىس دەپۋتاتى، پارتيانىڭ ايەلدەر قاناتىنىڭ تەڭ توراعاسى ءۇنزيلا شاپاق مەملەكەت باسشىسىنىڭ باستاماسىمەن جۇزەگە اسىرىلعان ساياسي رەفورمالار ەلدى جاڭعىرتۋدىڭ نەگىزگى تەتىگىنە اينالعانىن اتاپ ءوتتى. ونىڭ ايتۋىنشا، بۇل وزگەرىستەر جاڭا كونستيتۋتسيانىڭ قابىلدانۋىنا جول اشىپ، ادىلەتتى مەملەكەت قاعيداتتارىن نىعايتتى جانە ازاماتتاردىڭ ساياسي ۇدەرىستەرگە قاتىسۋ مۇمكىندىگىن كەڭەيتتى.
پاۆلودار وبلىستىق ءماسليحاتىنىڭ توراعاسى يليا تەرەنچەنكو جاڭا كونستيتۋتسيا ەل دامۋى ءۇشىن بەرىك قۇقىقتىق نەگىز قالىپتاستىرعانىن ايتىپ، رەفورمالاردىڭ تابىستى جۇزەگە اسۋى ولاردىڭ وڭىرلەردە ءتيىمدى ورىندالۋىنا تىكەلەي بايلانىستى ەكەنىن جەتكىزدى. ول مەملەكەتتىك ورگاندار، ساياسي پارتيالار جانە ازاماتتىق قوعامنىڭ بىرلەسكەن جۇمىسىنىڭ ماڭىزدىلىعىن اتاپ ءوتتى.
ءماجىلىس دەپۋتاتى نۇرسۇلتان بايتىلەسوۆ جۇرگىزىلىپ جاتقان رەفورمالار جاستار ءۇشىن جاڭا مۇمكىندىكتەر اشقانىن ايتتى. ونىڭ پىكىرىنشە، جاستار بۇگىندە تەك قوعامدىق باستامالارعا عانا ەمەس، زاڭ شىعارۋ پروتسەسىنە دە بەلسەندى ارالاسۋدا.
شىعىس قازاقستان وبلىستىق كوپسالالى مەديتسينالىق ورتالىعىنىڭ ديرەكتورى، باستاۋىش پارتيا ۇيىمىنىڭ ءتورايىمى گۇلميرا ساعيدۋللينا پارتيانىڭ الەۋمەتتىك جانە قايىرىمدىلىق جوبالارى، سونداي-اق وتباسىلاردى، جاستاردى، ارداگەرلەردى جانە ەرەكشە قاجەتتىلىگى بار ازاماتتاردى قولداۋ باعىتىنداعى جۇمىستارىن باياندادى.
سەزد قاتىسۋشىلارى ەلدەگى رەفورمالاردى جالعاستىرۋ، قوعامدىق كەلىسىمدى نىعايتۋ جانە مەملەكەت پەن قوعام مۇددەسى ءۇشىن كۇش بىرىكتىرۋدىڭ ماڭىزدىلىعىن اتاپ ءوتتى. سونداي-اق جيىن بارىسىندا AMANAT پارتياسى-نىڭ «ادىلەت» پارتياسىمەن بىرىگۋى تۋرالى مالىمدەمە جاسالدى. قاتىسۋشىلاردىڭ پىكىرىنشە، بۇل قادام تاجىريبە مەن رەسۋرستاردى بىرىكتىرىپ، ەل دامۋىنىڭ ستراتەگيالىق مىندەتتەرىن ءتيىمدى جۇزەگە اسىرۋعا مۇمكىندىك بەرەدى.
ايتا كەتسەك، 1 ماۋسىمدا قازاقستان رەسپۋبليكاسىنىڭ زاڭناماسىنا سايكەس ادىلەت مينيسترلىگى «ادىلەت» ساياسي پارتياسىن رەسمي تۇردە تىركەلگەن بولاتىن.
پارتيا قۇرامىنا ءتۇرلى سالا وكىلدەرى ەنگەن. ولاردىڭ قاتارىندا ەڭبەك ادامدارى، مۇناي سەرۆيستىك جانە تاۋ-كەن-مەتاللۋرگيا سالاسىنىڭ قىزمەتكەرلەرى، شاحتەرلەر، سونداي-اق ءبىلىم، دەنساۋلىق ساقتاۋ، عىلىم، كاسىپكەرلىك، IT, قۇقىق جانە كرەاتيۆ يندۋسترياسى سالالارىنىڭ ماماندارى بار.
