قازاقستاندا ونلاين-پلاتفورمالاردا بەيادەپ سوزدەر قولدانعانى ءۇشىن اكىمشىلىك جاۋاپكەرشىلىك ەنگىزۋ جوسپارلانۋدا، دەپ حابارلايدى "ادىرنا" ۇلتتىق پورتالى قازتاگ-قا سىلەپ.
ۇكىمەت باسشىسىنىڭ ايتۋىنشا، قازىرگى ۋاقىتتا «ونلاين-پلاتفورمالار جانە بۇقارالىق اقپارات قۇرالدارى ماسەلەلەرى بويىنشا قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنە وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ازىرلەنگەن. قۇجاتتا اقبتك-ءنىڭ 434-بابىنا تولىقتىرۋ ەنگىزىپ، ونلاين كەڭىستىكتەگى بەيادەپ سوزدەر ءۇشىن اكىمشىلىك جاۋاپكەرشىلىك بەلگىلەۋ كوزدەلگەن.
زاڭ جوباسىن وسى جىلدىڭ ماۋسىم ايىندا پارلامەنت قاراۋىنا ەنگىزۋ جوسپارلانىپ وتىر. پرەمەر-مينيستر قولدانىستاعى زاڭناماعا سايكەس، قوعامدىق ورىنداردا بەيادەپ سوزدەر ايتۋ، ازاماتتارعا ءتىل تيگىزۋ جانە قوعامدىق ءتارتىپتى بۇزاتىن وزگە دە ارەكەتتەر ۇساق بۇزاقىلىق رەتىندە باعالاناتىنىن ەسكە سالدى. مۇنداي قۇقىق بۇزۋشىلىق ءۇشىن 20 ايلىق ەسەپتىك كورسەتكىش كولەمىندە ايىپپۇل سالۋ، 20-دان 60 ساعاتقا دەيىن قوعامدىق جۇمىستارعا تارتۋ نەمەسە 5 تاۋلىكتەن 15 تاۋلىككە دەيىن اكىمشىلىك قاماۋعا الۋ جازاسى قاراستىرىلعان.
سونىمەن قاتار ۇكىمەت كاسىبي كوۋچتاردىڭ قىزمەتىن رەتتەۋگە قاتىستى تالاپتاردى دا كۇشەيتكەن. 2025 جىلعى 25 جەلتوقساندا بەكىتىلگەن كاسىبي ستاندارتقا سايكەس، كوۋچتار جوعارى بىلىمگە يە بولۋى جانە ءتيىستى سەرتيفيكاتتار ارقىلى ءوز بىلىكتىلىگىن راستاۋى قاجەت. سونداي-اق ولار ءار ءۇش جىل سايىن كەمىندە 40 ساعات كاسىبي بىلىكتىلىكتى ارتتىرۋ كۋرسىنان وتۋگە مىندەتتى.
ولجاس بەكتەنوۆتىڭ مالىمەتىنشە، جاستار اراسىندا قۇقىقتىق مادەنيەت پەن ادەپتى قارىم-قاتىناستى قالىپتاستىرۋ باعىتىندا تۇراقتى اقپاراتتىق-ءتۇسىندىرۋ جۇمىستارى جۇرگىزىلىپ كەلەدى. بۇقارالىق اقپارات قۇرالدارى مەن الەۋمەتتىك جەلىلەردە قۇقىق بۇزۋشىلىقتىڭ الدىن الۋعا ارنالعان مىڭداعان ماتەريال جاريالانعان.
