قىرعىزستان پرەزيدەنتى سادىر جاپاروۆ گرۋزيانىڭ پرەمەر-ءمينيسترى يراكلي كوباحيدزەگە رەسمي ساپارى اياسىندا قىرعىز حالقىنىڭ ەتنومادەني مۇراسىن تانىستىردى، دەپ حابارلايدى "ادىرنا" ۇلتتىق پورتالى.
ءىس-شارا 13 ماۋسىم كۇنى ىستىقكول وبلىسىنىڭ بوستەري اۋىلىنداعى «Nomad» ەتنوكەشەنىندە ءوتتى. قوناقتاردى دابىل اسپاپتارىنىڭ ۇنىمەن ەتنوگرافيالىق قويىلىمعا قاتىسۋشىلار قارسى الىپ، قىرعىز حالقىنىڭ سالت-ءداستۇرى، اڭشىلىق ونەرى مەن جاۋىنگەرلىك مۇراسىن پاش ەتتى. سونىمەن قاتار اقىن-يمپروۆيزاتور ارنايى قۇتتىقتاۋ ارناپ، شاعىن كونتسەرتتىك باعدارلاما ۇسىنىلدى.
مەملەكەت باسشىلارى كەيىن كيىز ۇيلەر قالاشىعىن ارالاپ، قىرعىز حالقىنىڭ ءداستۇرلى تۇرمىس-تىرشىلىگىن بەينەلەيتىن كورمەلەرمەن تانىستى. ولارعا قومىز جاساۋ ۇدەرىسى، ۇلتتىق مۋزىكالىق اسپاپتار، كيىزدەن بۇيىم دايىنداۋ، كۇمىس اشەكەيلەر سوعۋ، قىش ىدىس جاساۋ جانە ۇستالىق ونەر كورسەتىلدى. باعدارلاما بارىسىندا ماناسشى «ماناس» ەپوسىنان ءۇزىندى ورىنداپ، قوناقتارعا قىرعىزدىڭ اۋىز ادەبيەتى مۇراسىن تانىستىردى.
ەتنومادەني شارانىڭ سوڭىندا سادىر جاپاروۆ پەن يراكلي كوباحيدزەگە بۇركىتپەن اڭ اۋلاۋ ونەرى، قىز قۋ، جىگىتتەردىڭ ات ۇستىندەگى شەبەرلىك ونەرى، ساداق اتۋ جانە كاسكادەر شاباندوزداردىڭ شەرۋى سياقتى ۇلتتىق ات سپورتى ويىندارى كورسەتىلدى.
