اقش-تىڭ فەدەرالدىق سوتى قازاقستان، قىرعىزستان جانە وزبەكستان ازاماتتارىنا يمميگراتسيالىق ۆيزا بەرۋدى توقتاتۋ تۋرالى شەشىمنىڭ كۇشىن جويدى، دەپ حابارلايدى "ادىرنا" ءتىلشىسى فەرعاناعا سىلتەپ.
بۇل تۋرالى 21 تامىزدا نيۋ-يوركتىڭ وڭتۇستىك وكرۋگىنىڭ فەدەرالدىق سوتى شىعارعان شەشىمدە ايتىلعان. سۋديا دجانەتت ۆارگاس اقش مەملەكەتتىك دەپارتامەنتىنىڭ 75 ەل ازاماتىنا يمميگراتسيالىق ۆيزا بەرۋدى ۋاقىتشا توقتاتۋ ساياساتىن زاڭسىز دەپ تانىدى. سوتتىڭ پىكىرىنشە، اقش مەملەكەتتىك حاتشىسى ماركو رۋبيو وزىنە زاڭمەن بەرىلگەن وكىلەتتىگىن اسىرا پايدالانعان.
سوت شەشىمىندە ۆيزا الۋعا ءوتىنىش بەرگەن ادامنىڭ اقش تالاپتارىنا سايكەستىگى ونىڭ ازاماتتىعىنا قاراي جاپپاي ەمەس، ءار ءوتىنىش بويىنشا جەكە قارالۋى ءتيىس ەكەنى كورسەتىلگەن. بۇل رەتتە شەشىمدى كونسۋلدىق قىزمەتكەرلەرى قابىلداۋى قاجەت. اقش مەملەكەتتىك دەپارتامەنتى مەن ماركو رۋبيوعا قارسى تالاپتى Catholic Legal Immigration Network (CLINIC) جانە African Communities Together ۇيىمدارى، سونداي-اق يمميگراتسيالىق ۆيزا الۋعا ءوتىنىش بەرگەن شەتەل ازاماتتارى مەن تۋىستارىنىڭ اقش-قا كەلۋىنە جاعداي جاساۋعا تىرىسقان امەريكالىقتار بەرگەن. ءىس 2026 جىلعى اقپاندا قوزعالعان.
سوت داۋلى ساياساتقا عانا نەگىزدەلىپ بەرىلگەن ۆيزا باس تارتۋلارىنىڭ كۇشىن دە جويدى. مۇنداي وتىنىشتەر ەندى ءار ادامعا قاتىستى جەكە تارتىپپەن قايتا قارالۋى ءتيىس. الايدا سوتتىڭ بۇل شەشىمى بارلىق ءوتىنىش بەرۋشىگە اۆتوماتتى تۇردە ۆيزا بەرىلەدى دەگەندى بىلدىرمەيدى. ءوتىنىش بەرۋشىلەرگە اقش زاڭناماسىندا كوزدەلگەن باسقا دا نەگىزدەر بويىنشا ۆيزا بەرۋدەن باس تارتىلۋى مۇمكىن.
اقش بيلىگى 75 ەل ازاماتىنا يمميگراتسيالىق ۆيزا بەرۋدى 14 قاڭتاردا ۋاقىتشا توقتاتاتىنىن جاريالاعان. شەكتەۋ 21 قاڭتاردا كۇشىنە ەندى. وعان ورتالىق ازيا ەلدەرىنىڭ ىشىنەن قازاقستان، قىرعىزستان جانە وزبەكستان كىرگەن. تاجىكستان مەن تۇرىكمەنستان 75 ەلدىڭ تىزىمىنە ەنگىزىلمەگەن. سوندىقتان سوت شەشىمى بۇل ەلدەردىڭ ازاماتتارىنا تىكەلەي قاتىستى ەمەس.
سونىمەن قاتار ەكى ەلدىڭ ازاماتتارىنا قاتىستى باسقا دا شەكتەۋلەر بار. تاجىكستان مەن تۇرىكمەنستان ازاماتتارى تۋريستىك جانە ىسكەرلىك B1/B2 ۆيزالارىن راسىمدەگەن كەزدە ۆيزالىق كەپىلدىك باعدارلاماسىنا قاتىسادى. تامىز ايىنان باستاپ ونىڭ ەڭ جوعارى مولشەرى 20 مىڭ دوللارعا دەيىن ۇلعايتىلدى. بۇدان بولەك، تۇرىكمەنستان ازاماتتارىنا 1 قاڭتاردان باستاپ يمميگراتسيالىق ۆيزا بەرۋگە قاتىستى جەكە شەكتەۋ ەنگىزىلگەن.
