تۇركيانىڭ جاڭا كونستيتۋتسياسىن دايىنداۋ 26–28 ماۋسىم ارالىعىندا پرەزيدەنت رەجەپ تايىپ ەردوعاننىڭ توراعالىعىمەن وتەتىن بيلىكتەگى ادىلەت جانە دامۋ پارتياسىنىڭ ءۇش كۇندىك كەڭەسىنىڭ نەگىزگى تاقىرىپتارىنىڭ ءبىرى بولادى. بۇل تۋرالى ريا نوۆوستي جازدى، دەپ حابارلايدى «ادىرنا» ءتىلشىسى.
بۇعان دەيىن Sözcü گازەتى بيلىكتەگى پارتيانىڭ بۇرىنعى دەپۋتاتى شاميل تاياردىڭ مالىمدەمەسىنە سۇيەنە وتىرىپ، ەردوعاننىڭ شىلدەدە انكارادا وتەتىن ناتو سامميتىنەن كەيىن ەلدەگى ساياسي بەلسەندىلىكتى كۇشەيتىپ، جاڭا كونستيتۋتسيا قابىلداۋعا قاتىستى ناقتى قادامدار جاساۋى مۇمكىن ەكەنىن جازعان ەدى.
«جاڭا كونستيتۋتسيا ماسەلەسى الداعى پارتيالىق كەڭەستىڭ باسىم تاقىرىپتارىنىڭ قاتارىنا كىرەدى. حالىقپەن ءتۇسىندىرۋ جۇمىستارىنىڭ كەلەسى قادامدارى مەن ستراتەگياسى تالقىلانادى»، — دەدى اگەنتتىك سۇحباتتاسى.
ونىڭ ايتۋىنشا، كەڭەسكە پارتيا باسشىلىعى، مينيسترلەر، پارلامەنت دەپۋتاتتارى جانە پارتيانىڭ نەگىزىن قالاۋشىلار قاتىسادى. نەگىزگى نازار پارتيانىڭ جاڭا ساياسي كەزەڭدەگى ماقساتتارىنا اۋدارىلادى.
شىلدەدە وتەتىن ناتو ءسامميتى قارساڭىندا سىرتقى ساياسات پەن قاۋىپسىزدىك ماسەلەلەرىنە دە ەرەكشە كوڭىل بولىنەدى.
اگەنتتىك مالىمەتىنشە، تامىز ايىندا پارتيا وكىلدەرى سايلاۋشىلارمەن جۇمىستى كۇشەيتۋدى جوسپارلاپ وتىر. اتاپ ايتقاندا، جاڭا كونستيتۋتسيانىڭ قاجەتتىلىگى جونىندە قوعامدىق پىكىر ساۋالنامالارى مەن ءتۇسىندىرۋ ناۋقاندارىن وتكىزۋ كوزدەلگەن.
جاڭا كونستيتۋتسيا جوباسى 2027 جىلدىڭ باسىندا پارلامەنت قاراۋىنا ەنگىزىلۋى مۇمكىن.
ەردوعان بۇعان دەيىن بىرنەشە رەت تۇركياعا ەلدىڭ ودان ءارى دامۋىنا نەگىز بولاتىن جاڭا كونستيتۋتسيا قاجەت ەكەنىن ايتقان. ونىڭ پىكىرىنشە، قازىرگى كونستيتۋتسيا 1982 جىلى قابىلدانعان جانە ەنگىزىلگەن تۇزەتۋلەرگە قاراماستان، زامان تالابىنا تولىق ساي كەلمەيدى.
ايتا كەتەيىك، بيىل 15 ناۋرىزدا قازاقستاندا جاڭا كونستيتۋتسيا جوباسى بويىنشا جالپىحالىقتىق رەفەرەندۋم ءوتىپ، اتا زاڭ قابىلدانعان ەدى.
