فوتو: dimashnews.com
الەمگە تانىمال قازاقستاندىق ءانشى ديماش قۇدايبەرگەن شىعارماشىلىق ساپارى اياسىندا تۋعان جەرى اقتوبەگە بارىپ، ءوزى ءبىلىم العان وقۋ ورىندارى مەن بالالار لاگەرىندە وقۋشىلارمەن كەزدەستى، دەپ حابارلايدى "ادىرنا".
ونەر يەسى "شۇعىلا" بالالار لاگەرىندە وزىنە ارناپ LEGO بولشەكتەرىنەن الىپ پورترەت جاساعان بەس وقۋشىمەن جۇزدەسىپ، ولاردىڭ ەڭبەگىنە ريزاشىلىعىن ءبىلدىردى. العىس رەتىندە ديماش بالالارعا ءدال وسى لاگەرگە جولداما سىيلادى.
جوبانىڭ باستاماسى مەكتەپتەگى روبوتوتەحنيكا ۇيىرمەسىندە كوتەرىلگەن. مۇعالىم جانالى ماقاتتىڭ ۇسىنىسىمەن ءتورتىنشى سىنىپ وقۋشىلارى ديماشتىڭ ءومىرى مەن شىعارماشىلىعىن زەرتتەپ، شامامەن 1,5×2,5 مەترلىك كولەمدى كومپوزيتسيانى ءبىر اپتا ىشىندە قۇراستىرعان.
پەداگوگتەردىڭ ايتۋىنشا، مۇنداي جۇمىستار بالالاردىڭ شىعارماشىلىق قابىلەتىن، ۇقىپتىلىعىن جانە توپپەن جۇمىس ىستەۋ داعدىسىن دامىتادى. جوبا اۆتورلارى جەرلەس ونەرپازدىڭ جەتىستىگى وزدەرىنە شابىت بەرىپ، تۋعان ولكەنىڭ تالانتتارىن دارىپتەۋدى ماقسات ەتكەندەرىن جەتكىزدى.
