ەلىمىزدەگى ينفلياتسيا وتكەن جىلعى قىركۇيەكتەگى 13 پايىزعا جۋىق كورسەتكىشتەن بيىل مامىردا 10,4 پايىزعا دەيىن باياۋلاعان. بۇل تۋرالى ۇلتتىق بانك توراعاسى تيمۋر سۇلەيمەنوۆ ايتتى، دەپ حابارلايدى «ادىرنا» ءتىلشىسى.
«بيىل ينفلياتسيانى 9–11% ارالىعىندا بولادى دەپ بولجايمىز. 5 ماۋسىمدا بازالىق مولشەرلەمەنى 18%-دان 17%-عا دەيىن تومەندەتتىك. دەگەنمەن، ينفلياتسيا ءالى دە ەكى تاڭبالى دەڭگەيدە قالىپ وتىر، سوندىقتان تولىق تۇراقتاندىرۋ تۋرالى ايتۋ ەرتە. نەگىزگى تاۋەكەلدەر سىرتقى فاكتورلارمەن بايلانىستى، ونىڭ ىشىندە گەوساياسي تۇراقسىزدىق پەن الەمدىك ازىق-تۇلىك باعاسىنىڭ ءوسۋى اسەر ەتەدى. ىشكى تاۋەكەلدەر قاتارىندا كوممۋنالدىق قىزمەتتەر مەن جانارماي باعالارىنىڭ قايتا كوتەرىلۋى، سونداي-اق اقشا بازاسىنىڭ ۇلعايۋى بار»، – دەدى ول.
ۇلتتىق بانك باسشىسىنىڭ سوزىنشە، ينفلياتسيانى تۇراقتاندىرۋداعى ماڭىزدى فاكتورلاردىڭ ءبىرى – فيسكالدىق كونسوليداتسيا.
«ۇلتتىق قوردان ترانسفەرتتەردى 2,8 ترلن تەڭگە دەڭگەيىندە شەكتەۋ – دەزينفلياتسيالىق ماڭىزدى فاكتور. بيۋدجەتتىك كونسوليداتسيانى ءىس جۇزىندە جۇزەگە اسىرۋ ماڭىزدى. كوورديناتسيانىڭ تاعى ءبىر باعىتى – ەكونوميكانى قارجىلاندىرۋ باعدارلاماسىن تەڭگەرىمدى ىسكە اسىرۋ.
ءبىزدىڭ ويىمىزشا، ستراتەگيالىق ماڭىزى بار جوبالاردى قارجىلاندىرۋ قاجەت. باعدارلاما شيكىزاتتىق ەمەس سالالاردا قوسىلعان قۇندى ارتتىرۋى ءتيىس. ىشكى نارىقتا وتاندىق ءونىم ۇسىنىسىنىڭ ءوسۋى ينفلياتسيانى تومەندەتۋگە وڭ اسەر ەتۋى كەرەك. بيىلعى باستى ماقسات – ينفلياتسيانى ءبىر تاڭبالى دەڭگەيگە قايتارۋ»، – دەدى توراعا.
سونداي-اق ول 2025 جىلى ينفلياتسيا ەل ەكونوميكاسى ءۇشىن باستى سىن-قاتەر بولعانىن ايتتى.
«ۇكىمەتپەن بىرگە ءبىز ينفلياتسيالىق ترەندتى وزگەرتىپ، باعا ءوسىمىن باياۋلاتۋعا قول جەتكىزدىك. ينفلياتسيانى تەجەۋ ءۇشىن اقشا-نەسيە ساياساتى شارالارىنان باستاپ ماكروپرۋدەنتسيالدىق قۇرالدارعا دەيىن بارلىق تەتىك قولدانىلدى»، – دەدى ۇلتتىق بانك باسشىسى.
ۇلتتىق بانك توراعاسىنىڭ ايتقان ماسەلەلەرى مامانمەن بولعان سۇحباتتا كەڭىرەك تالدانعان.
تاقىرىپتى تارقاتۋ: «ينفلياتسيانىڭ باستى سەبەبى – يمپورتقا تاۋەلدىلىك». شىعاتىن جول قايسى؟
