قىرعىزستاندا بالالارعا اكەسى مەن اناسىنىڭ تەگىن بىرىكتىرۋ ارقىلى جاسالعان قوس فاميليا بەرۋگە مۇمكىندىك بەرەتىن زاڭ جوباسى قوعامدىق تالقىلاۋعا شىعارىلدى، دەپ حابارلايدى "ادىرنا" ۇلتتىق پورتالى.
باستامانى ەل پارلامەنتى دەپۋتاتتارىنىڭ ءبىر توبى ۇسىنعان. زاڭ جوباسىنا سايكەس، اتا-انالاردىڭ ءوزارا كەلىسىمى بولعان جاعدايدا، جاڭا تۋعان بالاعا اكەسى مەن اناسىنىڭ تەگىن سىزىقشا ارقىلى كەز كەلگەن رەتپەن بىرىكتىرىپ، قوس فاميليا رەتىندە راسىمدەۋگە رۇقسات ەتىلەدى.
سونىمەن قاتار قۇجاتتا ءۇش فاميليانى بىرىكتىرۋگە تىيىم سالۋ قاراستىرىلعان. زاڭ اۆتورلارىنىڭ پىكىرىنشە، مۇنداي شەكتەۋ كەيىنگى ۇرپاقتىڭ تەگىنىڭ شامادان تىس كۇردەلەنىپ كەتۋىنە جول بەرمەۋگە باعىتتالعان.
ۇسىنىلعان وزگەرىستەر ازىرگە قوعامدىق تالقىلاۋ كەزەڭىندە. قۇجات قولداۋ تاپقان جاعدايدا، قوس فاميليا بەرۋ ءتارتىبى قىرعىزستاننىڭ قولدانىستاعى زاڭناماسىنا ەنگىزىلۋى مۇمكىن.
