قازاقستاندا شىلدە ايىنىڭ باسىنان باستاپ تاۋارلىق گازدىڭ ورتاشا باعاسى شامامەن 33%-عا وسەدى. بۇل تۋرالى ەنەرگەتيكا ۆيتسە-ءمينيسترى قايىرحان تۇتقىشباەۆ مالىمدەدى، دەپ حابارلايدى "ادىرنا".
ونىڭ ايتۋىنشا، باعانىڭ كوتەرىلۋى گاز ينفراقۇرىلىمىن جاڭارتۋ جانە الداعى جىلىتۋ ماۋسىمىن ۋاقتىلى ءارى ساپالى وتكىزۋ ءۇشىن قاجەت شارا بولىپ تابىلادى.
مينيسترلىك وكىلى تۇتىنۋشىلار ءۇشىن گاز باعاسىنىڭ نەگىزسىز وسۋىنە جول بەرىلمەيتىنىن اتاپ ءوتتى. بۇل ماسەلە ۆەدومستۆونىڭ تۇراقتى باقىلاۋىندا.
ء«يا، العاشقى ءتورت ايدا گاز ءوندىرۋ كولەمى كەيبىر تەحنيكالىق اقاۋلارعا بايلانىستى تومەندەدى. بۇل تەڭىز كەن ورنىندا جانە باسقا دا بىرقاتار كەن ورنىندا بولعان جاعدايلارمەن بايلانىستى. الايدا بۇل تومەندەۋ حالىقتى گازبەن قامتاماسىز ەتۋگە اسەر ەتكەن جوق. سەبەبى «QazaqGaz» وپەراتورى ىشكى تۇتىنۋدى ترانزيتتىك گاز ەسەبىنەن قامتاماسىز ەتتى»، - دەدى ول.
سونىمەن قاتار، سولتۇستىك وڭىرلەردى گازداندىرۋ جوباسى بويىنشا «QazaqGaz» بەن «گازپروم» اراسىندا كەلىسىم اياسىنداعى جۇمىستار جالعاسۋدا.
ۆەدومستۆو وكىلىنىڭ مالىمەتىنشە، جىل سوڭىنا دەيىن جوبانىڭ نەگىزگى تەحنيكالىق جانە كوممەرتسيالىق شارتتارى ناقتىلانادى. جوسپارعا سايكەس، 2030 جىلعا قاراي قازاقستاننىڭ سولتۇستىك وڭىرلەرىنە گاز جەتكىزۋ كوزدەلىپ وتىر.
