اكە – تەك وتباسىنىڭ وتاعاسى عانا ەمەس، سونىمەن بىرگە بالانىڭ العاشقى تالىمگەرى، جاۋاپكەرشىلىكتىڭ ۇلگىسى جانە تىرەگى. كوكشەتاۋدا وتكەن «اكە – مەن سەنىڭ ءومىرىڭنىڭ جالعاسىمىن» اتتى فورۋمعا قاتىسۋشىلار ەر ادامنىڭ بالا تاربيەسىندەگى جانە وتباسىلىق قۇندىلىقتاردى ساقتاۋداعى ءرولى تۋرالى ءسوز قوزعادى، دەپ حابارلايدى وڭىرلىك كوممۋنيكاتسيالار قىزمەتى.
ءىس-شارا وتباسىلىق ساياساتتى دامىتۋ جانە گەندەرلىك تەڭدىك جوباسى اياسىندا ۇيىمداستىرىلدى. فورۋم مەملەكەتتىك ورگانداردىڭ، قوعامدىق بىرلەستىكتەردىڭ وكىلدەرىن، پەداگوگتاردى، كوپبالالى اتا-انالار مەن ءوڭىر تۇرعىندارىن بىرىكتىردى.
كەزدەسۋدى اشقان اقمولا وبلىسى ىشكى ساياسات باسقارماسى باسشىسىنىڭ ورىنباسارى سابىرحان كەنجەباەۆ وتباسى ينستيتۋتىن نىعايتۋ قوعامنىڭ ماڭىزدى مىندەتتەرىنىڭ ءبىرى بولىپ قالا بەرەتىنىن اتاپ ءوتتى.
«بۇگىن بالا تاربيەسىندەگى اكەنىڭ ءرولى تۋرالى ايتۋ وتە ماڭىزدى. وتباسىندا ومىرلىك باعدارلار، ۇلكەندەردى سىيلاۋ، جاۋاپكەرشىلىك جانە وتانعا دەگەن سۇيىسپەنشىلىك قالىپتاسادى. اكەنىڭ بالا ومىرىنە قاتىسۋى ونىڭ بولاشاعىنا ۇلكەن ىقپال ەتەدى»، - دەپ باسا ايتتى ول.
فورۋم سپيكەرلەرىنىڭ ءبىرى «تولىق ادام» جوباسىنىڭ اۆتورى جانە مارافونشى ەرنات راحمەتوللا بولدى. ول ءوز سوزىندە ەر ادامنىڭ وتباسى مەن بالا الدىنداعى جەكە جاۋاپكەرشىلىگى تاقىرىبىن قوزعادى.
تاربيە بەرۋدەگى تاجىريبەسىمەن جۇبايىمەن بىرگە 16 بالانى اسىراپ الىپ، تاربيەلەپ وتىرعان مۇرات قوبىلباەۆ ءبولىستى. ونىڭ ايتۋىنشا، ناعىز وتباسى قاندىق تۋىستىقپەن عانا ەمەس، اتا-انانىڭ ماحابباتىمەن، قامقورلىعىمەن جانە كۇندەلىكتى ەڭبەگىمەن قۇرىلادى.
ء«ار بالاعا نازار، قولداۋ جانە قاسىندا ارقاشان كومەكتەسەتىن ەرەسەك ادامنىڭ بار ەكەنىنە دەگەن سەنىم قاجەت. ءدال وسى نارسە بالالارعا ءوز قابىلەتتەرىن اشۋعا جانە بولاشاققا سەنىممەن قاراۋعا كومەكتەسەدى»، - دەدى فورۋم قاتىسۋشىسى.
«اكەلەر وداعى» رقب اقمولا وبلىستىق فيليالىنىڭ توراعاسى ەرلان زاكيريانوۆ اجىراسقاننان كەيىن اتا-انا جاۋاپكەرشىلىگىن ساقتاۋ تاقىرىبىن كوتەردى. ول ەرەسەكتەر اجىراسقان كۇننىڭ وزىندە بالا اكەسىمەن بايلانىسىن ۇزبەۋى ءتيىس ەكەنىن اتاپ ءوتتى.
قاتىسۋشىلار اراسىندا احمەت بايتۇرسىنۇلى اتىنداعى Binom School مەكتەپ-ليتسەيىنىڭ ديرەكتورى مارس ابلەزەۆتىڭ ءسوزى ۇلكەن قىزىعۋشىلىق تۋدىردى. ول قازىرگى بالالارعا ماتەريالدىق يگىلىك ەمەس، كوبىنەسە اتا-انالارىمەن بىرگە وتكىزگەن ۋاقىت جەتىسپەيتىنىنە نازار اۋداردى.
فورۋم بارىسىندا وتباسىلىق قارىم-قاتىناستى نىعايتۋ، ءداستۇرلى قۇندىلىقتاردى ساقتاۋ، اتا-انالىق جاۋاپكەرشىلىكتى ارتتىرۋ جانە ەر ادامداردىڭ وسكەلەڭ ۇرپاق تاربيەسىنە بەلسەنە قاتىسۋ ماسەلەلەرى تالقىلاندى.
ءىس-شارا اشىق ديالوگپەن اياقتالدى. وندا قاتىسۋشىلار سپيكەرلەرگە سۇراقتار قويىپ، ءوز تاجىريبەلەرىمەن ءبولىستى جانە وتباسىن قولداۋ مەن جاۋاپتى اكە بولۋ باستامالارىن ۇسىندى.
مۇنداي الاڭدار تەك بالا تاربيەسىنە قاتىستى وزەكتى ماسەلەلەردى كوتەرىپ قانا قويماي، سونىمەن بىرگە قوعامدا بەرىك وتباسى جاۋاپكەرشىلىكتەن، ءوزارا سىيلاستىقتان جانە بالانىڭ ومىرىنە ەكى اتا-انانىڭ دا بەلسەندى قاتىسۋىنان باستالاتىنىن تۇسىنۋگە كومەكتەسەدى.
