Äke – tek otbasynyŋ otaǧasy ǧana emes, sonymen bırge balanyŋ alǧaşqy tälımgerı, jauapkerşılıktıŋ ülgısı jäne tıregı. Kökşetauda ötken «Äke – men senıŋ ömırıŋnıŋ jalǧasymyn» atty forumǧa qatysuşylar er adamnyŋ bala tärbiesındegı jäne otbasylyq qūndylyqtardy saqtaudaǧy rölı turaly söz qozǧady, dep habarlaidy Öŋırlık kommunikasiialar qyzmetı.
Is-şara otbasylyq saiasatty damytu jäne genderlık teŋdık jobasy aiasynda ūiymdastyryldy. Forum memlekettık organdardyŋ, qoǧamdyq bırlestıkterdıŋ ökılderın, pedagogtardy, köpbalaly ata-analar men öŋır tūrǧyndaryn bırıktırdı.
Kezdesudı aşqan Aqmola oblysy ışkı saiasat basqarmasy basşysynyŋ orynbasary Sabyrhan Kenjebaev otbasy institutyn nyǧaitu qoǧamnyŋ maŋyzdy mındetterınıŋ bırı bolyp qala beretının atap öttı.
«Bügın bala tärbiesındegı äkenıŋ rölı turaly aitu öte maŋyzdy. Otbasynda ömırlık baǧdarlar, ülkenderdı syilau, jauapkerşılık jäne Otanǧa degen süiıspenşılık qalyptasady. Äkenıŋ bala ömırıne qatysuy onyŋ bolaşaǧyna ülken yqpal etedı», - dep basa aitty ol.
Forum spikerlerınıŋ bırı «Tolyq adam» jobasynyŋ avtory jäne marafonşy Ernat Rahmetolla boldy. Ol öz sözınde er adamnyŋ otbasy men bala aldyndaǧy jeke jauapkerşılıgı taqyrybyn qozǧady.
Tärbie berudegı täjıribesımen jūbaiymen bırge 16 balany asyrap alyp, tärbielep otyrǧan Mūrat Qobylbaev bölıstı. Onyŋ aituynşa, naǧyz otbasy qandyq tuystyqpen ǧana emes, ata-ananyŋ mahabbatymen, qamqorlyǧymen jäne kündelıktı eŋbegımen qūrylady.
«Är balaǧa nazar, qoldau jäne qasynda ärqaşan kömektesetın eresek adamnyŋ bar ekenıne degen senım qajet. Däl osy närse balalarǧa öz qabıletterın aşuǧa jäne bolaşaqqa senımmen qarauǧa kömektesedı», - dedı forum qatysuşysy.
«Äkeler odaǧy» RQB Aqmola oblystyq filialynyŋ töraǧasy Erlan Zakirianov ajyrasqannan keiın ata-ana jauapkerşılıgın saqtau taqyrybyn köterdı. Ol eresekter ajyrasqan künnıŋ özınde bala äkesımen bailanysyn üzbeuı tiıs ekenın atap öttı.
Qatysuşylar arasynda Ahmet Baitūrsynūly atyndaǧy Binom School mektep-liseiınıŋ direktory Mars Ablezevtıŋ sözı ülken qyzyǧuşylyq tudyrdy. Ol qazırgı balalarǧa materialdyq igılık emes, köbınese ata-analarymen bırge ötkızgen uaqyt jetıspeitınıne nazar audardy.
Forum barysynda otbasylyq qarym-qatynasty nyǧaitu, dästürlı qūndylyqtardy saqtau, ata-analyq jauapkerşılıktı arttyru jäne er adamdardyŋ öskeleŋ ūrpaq tärbiesıne belsene qatysu mäselelerı talqylandy.
Is-şara aşyq dialogpen aiaqtaldy. Onda qatysuşylar spikerlerge sūraqtar qoiyp, öz täjıribelerımen bölıstı jäne otbasyn qoldau men jauapty äke bolu bastamalaryn ūsyndy.
Mūndai alaŋdar tek bala tärbiesıne qatysty özektı mäselelerdı köterıp qana qoimai, sonymen bırge qoǧamda berık otbasy jauapkerşılıkten, özara syilastyqtan jäne balanyŋ ömırıne ekı ata-ananyŋ da belsendı qatysuynan bastalatynyn tüsınuge kömektesedı.
