شىمكەنت قالاسىندا بولعان ءورت سالدارىنان اۋىر كۇيىك شالعان سەگىز بالانىڭ اناسى اۋرۋحانادا قايتىس بولدى. قايعىلى وقيعا جەكە تۇرعىن ۇيدە ورىن العان، دەپ حابارلايدى "ادىرنا" ۇلتتىق پورتالى.
الدىن الا مالىمەتتەرگە سايكەس، وتباسى ءۇيىنىڭ اۋلاسىندا ورنالاسقان شاعىن تسەحتا كورپە مەن ماتراس تىگىپ، كاسىپپەن اينالىسقان. كۋاگەرلەردىڭ ايتۋىنشا، ءورت العاشىندا ماقتانىڭ تۇتانۋىنان باستالىپ، از ۋاقىت ىشىندە بۇكىل باسپاناعا جايىلعان. مارقۇمنىڭ جۇبايى ايەلىن قۇتقارۋعا ارەكەتتەنگەنىمەن، جالىننىڭ كۇشتى بولۋىنا بايلانىستى وعان جەتە الماعانىن ايتقان. دارىگەرلەر ايەلدىڭ دەنەسىنىڭ باسىم بولىگىن كۇيىك شالعانىن مالىمدەگەن.
وقيعا كەزىندە وتباسىنىڭ 17 جاستاعى ۇلى اناسىن جانىپ جاتقان ۇيدەن الىپ شىعۋعا تىرىسقان. سونىڭ سالدارىنان ءجاسوسپىرىمنىڭ ءوزى دە كۇيىك جاراقاتىن العان. ال ۇيدەگى قالعان جەتى بالا دەر كەزىندە سىرتقا شىعىپ، امان قالعان.
قازىر اتالعان دەرەك بويىنشا قۇقىق قورعاۋ ورگاندارى قىلمىستىق ءىس قوزعاپ، ءورتتىڭ شىعۋ سەبەپتەرى مەن قاۋىپسىزدىك تالاپتارىنىڭ ساقتالۋىنا قاتىستى تەرگەۋ جۇرگىزىپ جاتىر.
ورتتەن كەيىن كوپبالالى وتباسى باسپاناسىز ءارى تابىس كوزىنسىز قالعان. سونىمەن قاتار وتاعاسى دا ءورت كەزىندە جاراقات الىپ، مەديتسينالىق كومەككە جۇگىنگەن. جەرگىلىكتى بيلىك پەن جاۋاپتى ورگاندار وتباسىعا قولداۋ كورسەتۋ ماسەلەسىن قاراستىرۋدا.
