ۇلىتاۋ وبلىسىندا جاڭا ەمحانانى جەزقازعان قالاسىندا تاۋلىگىنە 250 كەلۋشىنى قابىلدايتىن زاماناۋي ەمحانانىڭ ىرگەتاسى قالاندى. ءۇش قاباتتى مەديتسينالىق نىساننىڭ جالپى اۋماعى شامامەن 8 500 شارشى مەتردى قۇرايدى. جوبانى «ۆەرنىي كاپيتال» كومپانيالار توبىنىڭ قۇرامىنداعى Beeline تسيفرلىق وپەراتورى قولداپ وتىر.
سالتاناتتى راسىمگە ۇلىتاۋ وبلىسىنىڭ اكىمى داستان رىسپەكوۆ پەن قور ديرەكتورى انار جۇماعۇلوۆا قاتىسىپ، جاڭا نىساننىڭ ءوڭىر تۇرعىندارى ءۇشىن ماڭىزدىلىعىن اتاپ ءوتتى.
ءوز سوزىندە وبلىس اكىمى جەزقازعان قالاسىنىڭ باتىس اۋدانى الداعى جىلدارى ءوڭىردىڭ جاڭا دامۋ ورتالىعىنا اينالاتىنىن جەتكىزدى.
«جەزقازعان قالاسىنىڭ باتىس اۋدانى – بولاشاعى زور، قارقىندى دامىپ كەلە جاتقان اۋماق. الداعى جىلدارى مۇندا 18 مىڭعا جۋىق تۇرعىن قونىستانادى دەپ كۇتىلۋدە. جالپى شاعىن اۋداندا 80-نەن استام كوپقاباتتى تۇرعىن ءۇي سالۋ جوسپارلانعان. سوندىقتان زاماناۋي الەۋمەتتىك ينفراقۇرىلىمدى قاتار دامىتۋ – ءبىزدىڭ باستى مىندەتتەرىمىزدىڭ ءبىرى. بۇگىن ىرگەتاسى قالانعان ەمحانا – سول جۇيەلى جۇمىستىڭ ناقتى ناتيجەسى»، – دەدى ءوڭىر باسشىسى داستان رىسپەكوۆ.
جاڭا مەديتسينالىق مەكەمەدە كونسۋلتاتسيالىق-دياگنوستيكالىق كابينەتتەر مەن 15 ورىندىق كۇندىزگى ستاتسيونار جۇمىس ىستەيدى. سونىمەن قاتار ساۋلەلىك دياگنوستيكا بولىمشەسى، كلينيكالىق-دياگنوستيكالىق زەرتحانا، امبۋلاتوريالىق حيرۋرگيا ورتالىعى جانە ايەلدەر كونسۋلتاتسياسى قاراستىرىلعان.
ەمحانا اۋماعىندا جەكە ورنالاسقان عيماراتتا تاۋلىك بويى قىزمەت كورسەتەتىن، توعىز بريگادالىق جەدەل جاردەم ستانتسياسى اشىلادى. بۇل تۇرعىندارعا شۇعىل مەديتسينالىق كومەكتى جەدەل ءارى ساپالى كورسەتۋگە مۇمكىندىك بەرەدى.
