قازاقستان پارلامەنتى قوس پالاتاسىنىڭ سوڭعى بىرلەسكەن وتىرىسى 26 ماۋسىمدا وتەدى، دەپ حابارلايدى "ادىرنا" ۇلتتىق پورتالى.
ءماجىلىستىڭ ءباسپاسوز قىزمەتىنىڭ حابارلاۋىنشا، ءماجىلىس توراعاسى ەرلان قوشانوۆ پارلامەنت پالاتالارىنىڭ بىرلەسكەن وتىرىسىن شاقىرۋ تۋرالى وكىمگە قول قويدى.
ءداستۇر بويىنشا، بىرلەسكەن وتىرىس پارلامەنت سەسسياسىن قورىتىندىلاپ، ودان كەيىن دەپۋتاتتار جازعى دەمالىسقا شىعادى.
الايدا 2026 جىلعى 1 شىلدەدەن باستاپ قازاقستاننىڭ جاڭا كونستيتۋتسياسى كۇشىنە ەنىپ، ەلدە ءبىرپالاتالى پارلامەنت جۇيەسى ەنگىزىلەدى. وسىعان بايلانىستى سەگىزىنشى شاقىرىلىمداعى ءماجىلىس پەن سەناتتان تۇراتىن قازىرگى زاڭ شىعارۋشى ورگان ءوز جۇمىسىن اياقتايدى.
وكىم ماتىنىندە: «قازاقستان رەسپۋبليكاسى كونستيتۋتسياسىنىڭ 58-بابى 4-تارماعىنىڭ 2) تارماقشاسىنا سايكەس قازاقستان رەسپۋبليكاسى پارلامەنتى پالاتالارىنىڭ بىرلەسكەن وتىرىسى 2026 جىلعى 26 ماۋسىم كۇنى ساعات 10:00-دە استانا قالاسىندا شاقىرىلسىن» دەپ كورسەتىلگەن.
جيىنعا ءماجىلىستىڭ 98 دەپۋتاتى مەن سەناتتىڭ 50 سەناتورى قاتىسادى دەپ كۇتىلۋدە. تامىز ايىندا جاڭا ءبىرپالاتالى پارلامەنت – قۇرىلتاي قۇرامىنا 145 دەپۋتات سايلانادى.
