رەسەي قازاقستانعا شامامەن 50 مىڭ توننا اي-92 ماركالى بەنزين جەتكىزۋ تۋرالى ءوتىنىش جاساعانى بەلگىلى بولدى. بۇل تۋرالى Reuters اگەنتتىگى مۇناي-گاز سالاسىنداعى دەرەككوزدەرگە سىلتەمە جاساپ جاريالادى، دەپ حابارلايدى "ادىرنا".
اگەنتتىكتىڭ مالىمەتىنشە، رەسەيدە سوڭعى ۋاقىتتا بىرقاتار مۇناي وڭدەۋ زاۋىتتارىندا جوسپاردان تىس جوندەۋ جۇمىستارى جۇرگىزىلىپ، كەيبىر ءوندىرىس ورىندارىنىڭ جۇمىسى ۋاقىتشا توقتاعان. سونىڭ سالدارىنان ەلدەگى بەنزين ءوندىرىسى وتكەن جىلمەن سالىستىرعاندا شامامەن 25 پايىزعا تومەندەگەن. ىشكى نارىقتاعى تاپشىلىقتىڭ الدىن الۋ ءۇشىن رەسەي كورشى مەملەكەتتەردەن قوسىمشا جانارماي جەتكىزۋ مۇمكىندىگىن قاراستىرىپ وتىر.
الايدا قازاقستان بيلىگى ازىرگە مۇنداي ءوتىنىشتىڭ تۇسكەنىن راستاعان جوق. قازاقستاننىڭ ەنەرگەتيكا ءمينيسترى ەرلان اقكەنجەنوۆ رەسەي تاراپىنان بەنزين جەتكىزۋگە قاتىستى رەسمي سۇرانىس كەلىپ تۇسپەگەنىن مالىمدەدى.
ساراپشىلاردىڭ ايتۋىنشا، رەسەيدىڭ قازاقستانعا وسىنداي وتىنىشپەن جۇگىنۋى العاش رەت ەمەس. بۇعان دەيىن، 2024 جىلدىڭ ءساۋىر ايىندا Reuters اگەنتتىگى رەسەيدىڭ قازاقستاننان 100 مىڭ توننا بەنزين كولەمىندە توتەنشە رەزەرۆ دايىنداۋدى سۇراعانىن حابارلاعان بولاتىن. ول كەزدە مۇنداي شارا رەسەيدەگى مۇناي وڭدەۋ زاۋىتتارىنا جاسالعان درون شابۋىلدارىنىڭ سالدارىن ازايتۋ ماقساتىندا قولعا الىنعانى ايتىلعان ەدى.
قازىرگى ۋاقىتتا ەكى ەل اراسىنداعى بەنزين جەتكىزۋ ماسەلەسىنە قاتىستى ناقتى كەلىسىمنىڭ بار-جوعى رەسمي تۇردە راستالعان جوق. دەگەنمەن بۇل جاعداي رەسەيدەگى جانارماي ءوندىرىسىنىڭ احۋالى مەن ايماقتاعى ەنەرگەتيكالىق قاۋىپسىزدىك ماسەلەلەرىنە نازار اۋدارتتى.
