الماتىدا جەدەل جاردەم دارىگەرلەرى تۇرعىن ءۇي كەشەنىنىڭ اۋلاسىندا ايەلدى بوساندىرىپ الدى، دەپ حابارلايدى «ادىرنا» ءتىلشىسى.
وقيعا 27 ماۋسىمدا شۇعىلا ىقشاماۋدانىنداعى «ۇلىتاۋ» تۇرعىن ءۇي كەشەنىندە بولعان. تۇرعىنداردىڭ ايتۋىنشا، جەدەل جاردەم كولىگى اۋلانىڭ كولىكتەرگە تولىپ كەتۋىنە بايلانىستى شاقىرتۋ ورنىنا بىردەن جەتە الماعان. سونىڭ سالدارىنان مەديتسينا قىزمەتكەرلەرى بوسانۋدى جەدەل جاردەم زەمبىلىندە قابىلداعان. ناتيجەسىندە ومىرگە قىز بالا كەلگەن.
الماتى قالاسىنىڭ قوعامدىق دەنساۋلىق ساقتاۋ باسقارماسىنىڭ مالىمەتىنشە، شاقىرتۋ ساعات 06:21-دە تۇسكەن، ال بريگادا وقيعا ورنىنا 06:31-دە جەتكەن.
«سالماعى 3 370 گرامم قىز بالا جەدەل جاردەم بريگاداسىنىڭ زەمبىلىندە دۇنيەگە كەلدى. كۇردەلى جاعدايعا قاراماستان، دارىگەرلەر انا مەن نارەستەگە قاجەت مەديتسينالىق كومەكتى كورسەتتى. كەيىن ولاردى قالالىق پەريناتالدىق ورتالىققا جەتكىزىپ، ەم-دومدى جالعاستىردى»،-دەلىنگەن حابارلامادا.
قازىرگى ۋاقىتتا انا مەن نارەستەنىڭ جاعدايى تۇراقتى.
تۇرعىنداردىڭ ايتۋىنشا، ارنايى قىزمەت كولىكتەرى بۇل اۋماققا كىرىپ-شىعۋدا ءجيى قيىندىقتارعا تاپ بولادى. اۋلالاردا اۆتوتۇراق ورىندارى جەتكىلىكسىز، ويتكەنى قۇرىلىس سالۋشى ولاردى قاجەتتى مولشەردە قاراستىرماعان. سونىمەن قاتار اۋداندا تۇرعىن ءۇي قۇرىلىسى دا قارقىندى تۇردە جالعاسىپ جاتىر.
تۇرعىندار بيلىكتىڭ نازارىن اۆتوتۇراق ماسەلەسىنە اۋدارىپ، جەدەل جاردەم، ءورت ءسوندىرۋ قىزمەتى جانە باسقا دا شۇعىل قىزمەتتەردىڭ كەدەرگىسىز جۇرۋىنە جاعداي جاسالادى دەپ ۇمىتتەنەدى.
