اتىراۋ وبلىسىنىڭ مامانداندىرىلعان قىلمىستىق ىستەر جونىندەگى سوتىندا ءتورت ادامدى ءولتىرۋ ءىسى بويىنشا سوت پروتسەسى جالعاسۋدا، دەپ حابارلايدى "ادىرنا" ءتىلشىسى.
ءىس بويىنشا باستى ايىپتالۋشى 29 جاستاعى سۇلتان سارسەماليەۆكە قاتىستى ايىپتاۋ اكتىسى تولىقتىرىلىپ، وعان ادام ءولتىرۋ، الەۋمەتتىك تولەمدەردى زاڭسىز الۋ جانە مال ۇرلىعى بويىنشا قوسىمشا ايىپتار تاعىلدى.
مەملەكەتتىك ايىپتاۋشىلاردىڭ مالىمەتىنشە، ماقسوت قارابالين مەن ءناسىپ وتەشقاليەۆانى ءولتىرۋ ەپيزودى بويىنشا قازاقستان رەسپۋبليكاسى قىلمىستىق كودەكسىنىڭ 2-بولىگى 13-تارماعى («باسقا قىلمىستى جاسىرۋ ماقساتىندا جاسالعان ادام ءولتىرۋ») قوسىلعان.
ال ميرامگۇل قارابالينانى ءولتىرۋ ەپيزودى بويىنشا قىلمىستىق كودەكستىڭ 99-بابى 2-بولىگىنىڭ 3 جانە 10-تارماقتارى ەنگىزىلدى. تەرگەۋ نۇسقاسىنا سايكەس، جابىرلەنۋشى دەنساۋلىعىنا بايلانىستى دارمەنسىز جاعدايدا بولعان جانە پوليتسياعا جۇگىنبەك بولعانى ءۇشىن ولتىرىلگەن.
سونىمەن قاتار، سۇلتان سارسەماليەۆكە قازا تاپقان ادامداردىڭ اتىنا ەسەپتەلگەن الەۋمەتتىك تولەمدەر مەن زەينەتاقىنى زاڭسىز يەمدەندى دەگەن كۇدىكپەن قازاقستان رەسپۋبليكاسى قىلمىستىق كودەكسىتىڭ 2-بولىگى 4-تارماعى («اقپاراتتىق جۇيە پايدالانۋشىسىن الداۋ ارقىلى جاسالعان الاياقتىق») بويىنشا ايىپ تاعىلدى. تەرگەۋ دەرەگىنشە، وسى ەپيزود بويىنشا كەلتىرىلگەن شىعىن كولەمى 520 996 تەڭگەنى قۇرايدى.
بۇعان دەيىن الاياقتىق رەتىندە قارالعان مال ساتۋعا قاتىستى ەپيزود قايتا سارالانىپ، ەندى قازاقستان رەسپۋبليكاسى قىلمىستىق كودەكسى («مال ۇرلىعى») بويىنشا قارالاتىن بولدى.
سوت وتىرىسىندا ايىپتالۋشى كىناسىن ءىشىنارا مويىنداعان. ونىڭ ايتۋىنشا، ول ميرامگۇل قارابالينانى جانە ايەلىنىڭ اتا-اناسىن قاساقانا ولتىرگەن، ال ناۋرىز مۇقانعاليەۆتىڭ قازاسى الدىن الا جوسپارلانباعانىن جانە جانجال كەزىندە ءوزىن-ءوزى قورعاۋ ماقساتىندا ارەكەت ەتكەنىن مالىمدەگەن.
سونداي-اق ايىپتالۋشى قىلمىستان كەيىن قازاقستاننان كەتىپ قالعانىن، مۇنى قارىزعا بايلانىستى اۋىر پسيحولوگيالىق كۇيزەلىس پەن شىندىقتان قاشۋعا ۇمتىلىسىمەن تۇسىندىرگەن.
مارقۇمداردىڭ تۋىستارى سوتتان مورالدىق جانە ماتەريالدىق شىعىن رەتىندە 70 ميلليون تەڭگە ءوندىرۋدى تالاپ ەتتى.
