قوستاناي وبلىسىندا تۇرعىنداردىڭ سۋداعى قاۋىپسىزدىگىن قامتاماسىز ەتۋ ماقساتىندا شومىلۋ ماۋسىمىندا قۇتقارۋ قىزمەتتەرىنىڭ جۇمىسى كۇشەيتىلىپ، اۋقىمدى پروفيلاكتيكالىق ءىس-شارالار جۇرگىزىلۋدە.
وبلىس اۋماعىندا 8 مىڭنان استام سۋ ايدىنى بار. ونىڭ ىشىندە شومىلۋعا رۇقسات ەتىلمەگەن 226 ورىن انىقتالعان. ءوڭىر اكىمىنىڭ قاۋلىسىنا سايكەس تۇرعىنداردىڭ قاۋىپسىز دەمالىسى ءۇشىن 25 رەسمي شومىلۋ ورنى بەلگىلەنگەن. ونىڭ التاۋى كوممۋنالدىق، ال 19-ى جەكەمەنشىك جاعاجاي بولىپ تابىلادى.
شومىلۋ ماۋسىمى كەزەڭىندە توتەنشە جاعدايلاردىڭ الدىن الۋ جانە جەدەل ارەكەت ەتۋ ماقساتىندا 120 قۇتقارۋشى، 35 تەحنيكا، 21 ءجۇزۋ قۇرالى جانە ارنايى سۇڭگۋىرلىك جابدىقتار تاۋلىك بويى دايىندىقتا تۇر. سونىمەن قاتار سۋعا تۇسۋگە ارنالماعان اۋماقتاردا جاعالاۋ سىزىعىن پاترۋلدەۋ ۇيىمداستىرىلىپ، موتورلى قايىقتارمەن جابدىقتالعان التى ءموبيلدى قۇتقارۋ بەكەتى جۇمىس ىستەۋدە.
قازىرگى تاڭدا قوستاناي وبلىسىنىڭ توتەنشە جاعدايلار دەپارتامەنتى حالىق اراسىندا تۇراقتى تۇردە ءتۇسىندىرۋ جۇمىستارىن جۇرگىزۋدە. بۇل باعىتتاعى جۇمىستارعا پوليتسيا قىزمەتكەرلەرى، ۇلتتىق ۇلان اسكەري قىزمەتشىلەرى، ءبىلىم بەرۋ ۇيىمدارىنىڭ وكىلدەرى مەن ەرىكتىلەر تارتىلعان. ۆەدومستۆوارالىق ءوزارا ءىس-قيمىل اياسىندا قوسىمشا پاترۋلدەۋ شارالارى ۇيىمداستىرىلىپ، تۇرعىندارعا سۋداعى قاۋىپسىزدىك تالاپتارى كەڭىنەن تۇسىندىرىلۋدە.
ماماندار تۇرعىنداردى تەك ارنايى جابدىقتالعان جانە رۇقسات ەتىلگەن ورىنداردا شومىلۋعا، بالالاردى قاراۋسىز قالدىرماۋعا، سونداي-اق الكوگولدىك ىشىمدىك ىشكەننەن كەيىن سۋعا تۇسپەۋگە شاقىرادى. قاراپايىم قاۋىپسىزدىك ەرەجەلەرىن ساقتاۋ ادام ءومىرى مەن دەنساۋلىعىن قورعاۋدىڭ باستى كەپىلى بولىپ تابىلادى.
