الماتى – قورعاس اۆتوجولىندا ءۇش ادامنىڭ قازا بولۋىنا سەبەپ بولعان جول-كولىك وقيعاسىنا قاتىستى كۇدىكتىنىڭ جەكە باسى انىقتالدى، دەپ حابارلايدى "ادىرنا" ۇلتتىق پورتالى.
بۇل تۋرالى جۋرناليست ميحايل كوزاچكوۆ مالىمدەدى.
اقپاراتقا سايكەس، جول تالعامايتىن Haval كولىگىن باسقارعان ازامات – ىشكى ىستەر ورگاندارىندا قىزمەت اتقاراتىن 37 جاستاعى پوليتسيا مايورى ابىلاي جارىلقاسىنۇلى.
جول-كولىك وقيعاسى 23 ماۋسىم كۇنى ساعات 17:00 شاماسىندا الماتى – شەلەك – قورعاس اۆتوجولىنىڭ 132-شاقىرىمىندا بولعان. الدىن الا مالىمەت بويىنشا، Haval اۆتوكولىگى قارسى قوزعالىس جولاعىنا شىعىپ كەتىپ، Audi 100 كولىگىمەن سوقتىعىسقان.
اپات سالدارىنان Audi كولىگىنىڭ جۇرگىزۋشىسى 41 جاستاعى احمەتجان ءجۇنىسوۆ، ونىڭ 40 جاستاعى جۇبايى گۇلحۇمار ماحامەتوۆا جانە 20 جاستاعى قىزى ديارا ءتيىپ وقيعا ورنىندا قازا تاپقان.
سونىمەن قاتار، مارقۇمداردىڭ تاعى ەكى بالاسى، ديارانىڭ ءبىر جاسقا تولماعان ءسابيى جانە Haval كولىگىنىڭ جولاۋشىسى ايدار ۇرىستىمبەتوۆ ءتۇرلى دەنە جاراقاتتارىمەن اۋرۋحاناعا جەتكىزىلگەن.
ءجۋرناليستىڭ مالىمەتىنشە، كۇدىكتىنىڭ قانىنان 3,3 پروميللە ەتيل ءسپيرتى انىقتالعان. ول ىشكى ىستەر ورگاندارىندا 15 جىلدان استام ۋاقىت قىزمەت ەتىپ، پوليتسيا مايورى شەنىنە دەيىن كوتەرىلگەن.
قازىر اتالعان دەرەك بويىنشا قازاقستان رەسپۋبليكاسى قىلمىستىق كودەكسىنىڭ 345-1-بابى («كولىك قۇرالىن الكوگولدىك، ەسىرتكىلىك جانە (نەمەسە) ۋىتقۇمارلىق ماساڭ كۇيدە باسقاراتىن ادامنىڭ جول ءجۇرىسى نەمەسە كولىك قۇرالدارىن پايدالانۋ قاعيدالارىن بۇزۋى») بويىنشا قىلمىستىق ءىس قوزعالدى. كۇدىكتىگە قاتىستى سوتقا دەيىنگى تەرگەۋ امالدارى جۇرگىزىلىپ جاتىر.
