رەسەي دەپۋتاتى نينا وستانينا ەلدەگى جانارماي داعدارىسىنىڭ اۋقىمى رەسمي دەڭگەيدە تولىق ايتىلماي وتىرعانىن ايتتى، دەپ حابارلايدى "ادىرنا" ۇلتتىق پورتالى شەتەلدىك باق-قا سىلتەپ.
ونىڭ ءسوزىن «كروۆاۆايا بارىنيا» Telegram ارناسى جاريالادى.
دەپۋتاتتىڭ ايتۋىنشا، ۋكراينا جاساعان شابۋىلداردىڭ سالدارىنان رەسەيدەگى مۇناي وڭدەۋ زاۋىتتارىنىڭ شامامەن 30 پايىزى ۋاقىتشا جۇمىسىن توقتاتقان.
«نەلىكتەن جاۋاپتى ۆيتسە-پرەمەر مۇناي وڭدەۋ زاۋىتتارىنىڭ ۇشتەن بىرىنە جۋىعى ىستەن شىققانىن اشىق ايتپايدى جانە نەگە وسى جاعدايعا بايلانىستى توتەنشە شارالار قابىلدانبايدى؟» – دەدى وستانينا.
ول مۇنداي ماسەلەلەردى جاسىرۋ جانە ۋاقىتىلى شەشىم قابىلداماۋ، اسىرەسە ەگىن جيناۋ ناۋقانى قارساڭىندا قاۋىپتى ەكەنىن اتاپ ءوتتى. ونىڭ سوزىنشە، ديزەل وتىنىنىڭ تاپشىلىعى اۋىل شارۋاشىلىعى جۇمىستارىنا اسەر ەتىپ، ازىق-تۇلىكپەن قامتاماسىز ەتۋگە قاۋىپ ءتوندىرۋى مۇمكىن.
بۇعان دەيىن رەسەيدىڭ وڭتۇستىك وڭىرلەرىندە ديزەل وتىنىنىڭ تاپشىلىعى مەن ونىڭ باعاسىنىڭ كۇرت قىمباتتاعانىنا شاعىم تۇسكەن. سونىمەن قاتار ازىق-تۇلىك وندىرۋشىلەرى جانارماي جەتىسپەۋىنە بايلانىستى تاۋارلاردى جەتكىزۋ مەرزىمدەرىنىڭ كەشىگۋى مۇمكىن ەكەنىن ەسكەرتكەن.
INFOLine زەرتتەۋ كومپانياسىنىڭ مالىمەتىنشە، رەسەيدىڭ بىرقاتار وڭىرىندە الەۋمەتتىك ماڭىزى بار تاۋارلاردىڭ، سونىڭ ىشىندە ەت، ءسۇت جانە جۇمىرتقا سياقتى تەز بۇزىلاتىن ونىمدەردىڭ تاپشىلىعىنىڭ بەلگىلەرى بايقالعان.
ماتەريالدا ۋكراينا قارۋلى كۇشتەرى مامىر ايىندا رەسەيدەگى 16 مۇناي وڭدەۋ زاۋىتىنا شابۋىل جاساعانى ايتىلعان. سونىڭ سالدارىنان ەلدىڭ ورتالىق بولىگىندەگى مۇناي وڭدەۋ كولەمى ايتارلىقتاي قىسقارىپ، زاۋىتتاردىڭ جۇكتەمەسى 2009 جىلدان بەرگى ەڭ تومەنگى دەڭگەيگە تۇسكەنى حابارلاندى.
وسى جاعداي اياسىندا رەسەيدىڭ 40-تان استام وڭىرىندە، ونىڭ ىشىندە رەسەي باقىلاۋىنداعى ۋكراينا اۋماقتارىندا جانارماي ساتۋعا شەكتەۋلەر ەنگىزىلگەن. ال جانارماي جەتكىزۋدەگى ىركىلىستەر مەن جانارماي قۇيۋ بەكەتتەرىندەگى تاپشىلىق تۋرالى شاعىمدار 85 وڭىردەن تۇسكەنى ايتىلدى.
